Sorsunneq Irakimi angusaqarfiunngilaq
Irak-imi sorsunnermut atatillugu killiffik sumiinnersoq pillugu Københavnip ilisimatusarfiani Lektori Peter Viggo Jacobsen, ima oqarpoq:
Irak-imi sorsunnermut atatillugu, qaammatini kingullerni arfinilinni eqqissisimatitsinissaq anguniarlugu, USA-p sakkutuuni 30.000-inik ilasimavai. Nalunaarusiamili kingullermi oqaatigineqarpoq, anguniarsimasaagaluit anguneqarsimanngitsut. Amerikamiut sakkutuuisa nakkutigisinnaasaat annikitsuinnaavoq, aammalu Irak-ip iluani pissutsinik isumaqatigiinngittoqarnerani iluarsiiniarnermi iluatsitsisoqarpallaarsimanngilaq.
USA-mi Demokratit piumasaraat, USA-p sakkutuuni angerlartittariaqaraat, tamannalu siunnersuut silatusaarnerunersoq, apeqqutigineqarmat, Lektori Peter Viggo Jacobsen, ima oqarpoq:
- Sakkutuunik angerlarartitsinissaq isumaqatiginarsinnaavoq, naluneqanngitsutuummi sakkutuut Irak-imiittut angerlarartinneqarnissaat, USA-mi innuttaasut 70 procentiisa kissaatigaat. Aamma USA-mi qinersinermi kingullermi Demokratit qineqqusaarnerminni oqariartuutigaat, sakkutuut Irak-imiittut angerlarartinneqassasut, taamatullu oqarneq demokratit qinigaangaatsiarnerannik kinguneqarpoq. Peter Viggo Jacobsen Københavnip ilisimatusarfianeersoq DR-imut taama oqarpoq.
