Sorliit salloqittaataanersut nalunarluinnaqaat
Ullumi apriilip ulluisa aallaqqaataanni, ilisimaneqartutut tusakkavut atuakkavullu tamaasa upperisinnaanngilavut.
Maani aviisip Sermitsiap allaaseraa, Namminersorlutik Oqartussat allaffeqarfitsik Kangerlussuarmut nuunniaraat. Taamaaliortoqarniarporooq Namminersorlutik Oqartussat allaffeqarfianni sulisut Danmarkiliassatillutik Air Icelandip timmisartuutaannut ilaanatik Air Greenlandimut ilaasarniassammata.
Danmarkimi aviisit apriilip aallaqqaataanni salloqittaanissartik aamma tunuarsimaarfiginngilaat. Ekstra Bladet allaaserisaqarpoq, tennis-ertartup Caroline Wozniackip qallunaat janteloviat qatsullugu Polenimi innuttanngorsimasoq. Fyens Stiftstidendemi naartusut mobiltelefonitik atortorissaarusersinnaagaat allaaserineqarpoq, taamaalillutik naartortik namminneerlutik scannerlugu misissorsinnaalerlugu. E-mailikkut nassitsineq 7 øreqalissasoq JyskeVestkystenimi allaaserineqarpoq, taamaalilluni piumasaannarminnik nassiussuisartut killilersimaarneqarniassammata.
Allaammi Danmarkimi tusagassiorfiit apriilip aallaqqaataanni salloqittaassutissaminnik ujaasinerminni Nunarput isumassarsiorfigisimavaat.
Inuup avataarsuaneerup inuaanik Nunatsinni nassaartoqarsimasoq, Nittartakkami videnskab.dk-mi allaaserineqarpoq.
Assammik arsartartut klubbiat Viborg HK nittartakkamini allappoq, sungiusaasartoq tusaamasaq Anja Andersen atorfinitsinneqarsimasoq - taassumalu ikiortigissagaa, qimmeq pingasunik ukiulik Buller, kalaallit qimuttuannit aamma Irlandimi aallaaniartartut qimmiannit akusaasoq.
Aamma uagut ullaaq radioaviisimi salloqittaavugut. Taamaalilluta erseqqissassavarput Nuup qeqqani pisiniarfissualiortut sanaartorfimminni nunap iluani uraanimik ajornartorsiuteqanngimmata aamma Siumut IA-lu uraanisiornermut isummaminnik allanngortitsinngimmata.
