Sorlak partiilersorpallaarani suliniarpoq

Meeqqat inuusuttullu siunnersuisooqatigiiffiat sapaatip akunnerata naanerani ukiumoortumik ataatsimeeqqammerpoq.

Kaalinnguaq Siegstadip oqaluttuara suliassat siulersuisuusimasuninngaanniit innersuussutigineqartut ingerlateqqinneqarnissaat isumaqatigiissutigineqarsimasut.

- Ukiuni tulliuttuni asiartitsisarlutalu katerisimaartitsisarnissarput siunniupparput, Kaalinnguaq Siegstad oqarpoq.

Meeqqat inuusuttullu kattuffiisa peqatigiiffiisalu namminneq piumassutsiminnik ingerlanneqartut Sorlak ataatsimut kattuffigaat.

Sorlak kattuffinnik isumasioqatigiissitsisarpoq, ataatsimeersuartitsisarlunilu, soorlu aamma pikkorissartitsisartoq.

Kalaallit Nunaanni meeqqat inuusuttullu pillugit apeqqutini Sorlak oqalliseqataasarpoq, ajornartorsiutinillu aaqqiiniaqataassalluni, siulersuisunngortullu partiilersorpallaaratik sulinissaat aamma isumaqatigiissutigineqartoq, Kaalinnguaq Siegstadip oqaatigaa:

- Ataqatigiilluta, suleqatigiilluta, partiilersortoqaranilu ingerlanissarput, pingaarnertut isumaqatigiissutigaarput, Kaalinnguaq Siegstad oqarpoq, nangillunilu:

- Aamma kingumut qivialaaraanni takuneqarsinnaavoq tusagassiutinut attaveqarniarnerit sanngiiffiulaartarsimapput, tassa avammut kiinnerniartarnerput unammilligassanut ilaavoq. Saqqumilaarnerusariaqarpugut, Sorlaap unittooqqasutut isigineqannginnissaa pingaartipparput, taamaammat avammut saqqummertarnissarput pingaartipparput, Sorlammi siulittaasunngoqqammersoq Kaalinnguaq Siegstad oqarpoq.