Sorlak isornartorsiorneqarpoq

Sorlaap Sisimiuni oktobarip pingajuanniit arfineq aappaanut isumasioqatigiissitsinera uparuartorneqarpoq.

Isornartortorsiuisunullu ilaavoq

Mary Hiratsuka Alaskaminngaaneersoq, taannalu Sorlaap isumasioqatigiissitsinerani peqataasunut ilaavoq.

- Isumaqarpunga isumasioqatigiissitsineq aaqqissuulluagaangitsoq, taamatullu isumasioqatigiissitsineq erseqqissumik aaqqissuussamik aalajangiiffigineqartussamik oqallittoqanngitsoq.

Isumasioqatigiissitsinermi anguniarneqartutut oqaluuserineqartut qulit eqikkarlugit allanneqarput. Kisiannili oqaatigineqanngilaq anguniakkat taakku qanoq qaqugulu, anguniarneqassanersut qanorlu suliarineqassanersut.

Angusaqartoqarsinnaagaluarpormi oqaluuseriinnarnagit anguniarneqarsinnaagaluarpata, Mary Hiratsuka oqarpoq.

Siumup inuusuttut suleqatigiiffiani siulittaasup Benjamin Kielsenip Sorlaap isumasioqatigiissitsinera isornartorsiorpaataaq.

- Siumup inuusuttaaniit maqaasisimavarput Sorlaap siulittaasua, taassuma ilaannakortumik peqataanera tulluartissimannginnatsigu. Taamatullu aaqqissueqataasoq aamma ilaannakortumik peqataanera apeqqusernartoqartissimavarput, angalaneq taamak akisutigisoq, Benjamin Kielsen oqarpoq.

Sorlaap isumasioqatigiissitsinera 377.000 kr-nit missaanik akeqarpoq, inunnillu 35-it missaanit peqataaffigineqarluni.