Sorlaat Partiiata ilinniartitaaneq immikkut iliuuseqarfiginiarpaa

Sulisut ilinniarteqqinneqarnerisigut ilinniartitaanerullu immikkut iliuuseqarfigineratigut Nunatta aningaasaqarniarnera pitsanngorsaavigineqarsinnaavoq, taama oqarpoq inatsisartunut qinigassanngortittoq Nikoline Ziemer, Sorlaat Partiiat.
Allattoq Elisa Isaksen
maajip 26-at 2009 06:49

- Aamma iluaqutaanavianngilaq innuttaasut ilinniagaqarsimanngitsutut suliffissuarnilu sulisussatut isigineqartuassappata. Nikoline Ziemer ippassaq unnukkut KNR-mi apeqqarissaarfigineqarnermini ilaatigut taama qoarpoq.

Namminersulernermi sulisartut pitsaanerusumik ilinniartinneqarnermikkut, suliassat ullumikkut tikisitanit isumagineqartartut isumagisinnaalissavaat, Nikoline Ziemer oqarpoq, nangillunilu:

- Sulisinnaasut 60 procentiisa pisortani atorfeqarnerat aamma naammaginanngilaq. Maani najugallit amerlanerusut inuussutissarsiutinut Nunatta aningaasarsiorfigisinnaasaannut sulilersinneqartariaqarput, Nikoline Ziemer apeqqarissaarfigineqarnermini ilaatigut oqarpoq.