Soraarsitsisoqassanngilaq

Naalakkersuisut siulittaasuat Hans Enoksen tusagassiuutinut nalunaarummini ullumi taama allappoq. Taama nalunaaruteqarpoq, Siumup naalakkersuinermut tunngasunut oqaaseqartartuata Lars-Emil Johansenip Namminersornerullutik Oqartussani ileqqaarnissaq allaffissornikkullu pisariillisaanissamut atatillugu sulisunik pisortanillu soraarsitsisariaqalersinnaaneq Radioaviisimi ippassaq oqaatigereeraalu.

Tamannali Hans Enoksenip tusagassiuutinut nalunaaruteqarluni akerlilerpaa. Naalakkersuisut siulittaasuat naapertorlugu allaffissornerup aaqqissuussaanerata allanngortinneratigut kalaallisut oqalussinnaasunik pisortaanernik arfineq-marlunnik atorfinitsitsinikkut soraarsitsisoqassanngilaq.

- Matumuuna erseqqissaatigissavara sulisorisanik danskinik imaluunniit allanik soraarsitsinissaq minnerpaamilluunniit siunertarineqanngimmat, Hans Enoksen allappoq.

Namminersornerullutik Oqartussani aaqqissuussaanermut nutaamut ikaarsaarnermi sulisut peqatigilluinnarlugit kusanartumillu periuseqarluta iliuuseqarniarpugut, taamaattumik sulisorisat minnerpaamilluunniit toqqissisimanngissutissaqanngillat. Allaffissornermi pisariillisaaneq peqqutaalluni sulisorisat ikilisinneqarnissaat siunissami pissusissamisoortumik piartuaassaaq, tassa soraartut atorfigisaasa nalilersorluarnerisigut, Hans Enoksen tusagassiuutinut nalunaarummini ilaatigut taama allappoq.