KNI-mi aningaasartuutikillisaasoqassammat soraarsitsiortortoqarnissaa ilimagisinnaallugu KNI-p pisortarisimasaata tunuartitaaqqammersup Gerhardt Petersenip ippassaq oqaaserisai ilisimasaqarfiginagu, KNI-p siulersuisuisa siulittaasuat Simon Olsen oqarpoq:
- Tupaallannarpoq, qullersat siulersuisullu tamanna ilisimasaqarfiginngilaat aamma soraarsitsiortornissamik pilersaaruteqartoqanngilaq. Simon Olsen erseqqissaavoq.
KNI-mi soraarsitsiortortoqarsinnaanera pillugu pisortaanerusimasup tunuartitaaqqammersup Gerhardt Petersenip oqalunnera nipangiussisimasussaatitaanermik unioqqutitsinerunersoq KNI-mi siulersuisut maanna aamma nalilersuiffigileruttoraat Simon Olsen oqarpoq.
- Tamanna ilanngullugu nalilersuiffigileruttorparput mianerisariaqartullu pillugit atsioqatigiittussaalluta. Simon Olsen nassuiaavoq.
KNI-mi pisortaanerugallartoq Frederik Olsen allappoq, nassuerutigalugu suliffeqarfiit Arctic Green Food aamma Assartuivik aningaasaqarnermikkut naapertuuttumik ingerlanngimmata ataavartumik aaqqiissuteqarsinnaanissaq sulissutigalugu, tamanna qanoq paasisariaqarnersoq siulersuisut siulittaasuannut Simon Olsenimut apeqqutigaarput.
- Suliffeqarfiit allanut tunniunneqanngikkunik suleqatigiilluni ingerlanneqarsinnaanerat misissuiffigileruttorparput, tamatumunnga tunngasut juullip ukiortaallu akornanni naammassinissaat neriuutigaara. KNI-p siulersuisuini siulittaasoq Siumumeersoq Simon Olsen taama oqarpoq.