Soraarninngornissamut ukiut qaffanneqarnissaat akerlerineqaqaaq

Frankrigimi præsidentip Nicolas Sarkozyp soraarninngornissamut ukiut 60-iniit 62-inut qaffallugit allannguiniarnera suliumajunnaarnernik kinguneqarpoq.
oktobarip 19-at 2010 13:03

Inuit 480.000-it missaat akerliussutsitsimik takutitsisut præsident Sarkozy nakuusersunut aserorterinernullu mianersoqqusivoq.

- Inuinnaat naalakkersueqataaneranni kikkulluunniit oqaaseqarsinnaatitaapput, tamannali nakuusernani ingasaassinanilu pissaaq. Ajornartoornernik nalaanneqartilluta, inuit sulinissaannik akornusersuisunik benzinamillu pisisinnaajunnaarsitsisunik, naalakkersuisut qanoq iliortassanersut pillugit sukkanerpaamik ataatsimiititsissaanga, franskit præsidentiat oqarpoq.

Pisortani atorfillit suliumajunnaartut ullumi nunap annersaani ilaasartaatini angallanneq akornusersorsimavaat, præsident Nicolas Sarkozy naalakkersuisuilu soraarninngornissamut siunnersuutaannik taamaasitsitsiniarlutik sulinermik kattuffiit akerliussutsitsimik takutitsisut aqqusinermiittut amerlisimavaat. Siornatigut kattuffiit soraarninngornissamut ukiut qaffanneqarnissaat marloriarluni unitsereersimavaat.

Naalakkersuisut soraarninngornissap 60-iniit 62-inut qaffanneqarnissaat inuiaqatigiit utoqqaligaluttuinnarnerannik soraarninngortartullu amerlivallaanngissaannik tunngaveqartippaat.