Soraarnerussutit pillugit inatsit amigaateqarpoq

Soraarnerussutisiaqarnernut akileraarutit maannakkut atuuttut eqqarsaatigalugit, taakkulu aaqqinneqarnissaat siunertaralugu, Nunatta Danmarkillu akornanni isumaqatigiinniutaalerpoq. Aningaasaqarnermut Naalakkersuisup, Maliina Abelsenip aamma danskit Akileraartarnermut ministeriata ullumi ataatsimeeqatigiinnerminni tamanna eqqartugaasa ilagaat.
februaarip 21-at 2012 17:10

Nunatsinni innuttaasut ilaat utoqqalinerminni Danmarkimut nuukkaagata, tamanna Nunatta akileraarutitigut millionerpassuarnik annaasaqaatigisarpaa.

Ullumikkut atuuttoq tassaavoq, soraanerusutisiassanik toqqorterinermi, taakku nammineerluni nalunaarsukkanut ilanngaatigitinneqartarnerat, utoqqalillunilu soraarnerusutisiaqalernermi taakku akileraaruserneqartarlutik.

Ilaatigullu tamanna pissutigalugu, sulisartut utoqqalinerminni Danmarkimut nuunnissartik kissaatigisarpaat, taamaalillunilu Nunatsinnut akileraarutissaagaluit annaaneqartarlutik.

Akileraaruseriaatsip siunissami allanngortinneqarnissaa eqqarsaatigalugu maanna isumaqatigiinniartoqalersoq, Aningaasaqarnermut Naalakkersuisoq, Maliina Abelsen oqarpoq.

- Iluanaarutit, soorlu qallunaat soraarnerussutisiassatut katersaat akileraarusernissaannut periarfissat ammaanneqassapput. Tamannali isumaqatigiissutaanngilaq Kalaallit Nunaannut pituttuisoq, siunissamili periarfissiiginnarluni, soraarnerusutisiat pillugit sulisitsisut sulisartullu isumaqatiginiarnissaannut, Aningaasaqarnermut Naalakkersuisoq, Maliina Abelsen oqarpoq.

Taassuma danskit akileraartarnermut ministeriat, Thor Möger Pedersen ullumi ataatsimeeqatigalugu isumaqatigiissuteqarfigaa, siunissami akileraaruseeriaatsip allanngortinnissaanut Nunatta qanoq iliuuseqarsinnaalerneranik ammaassisumik sulissuteqartoqassasoq.

Utoqqaat Nunatsinniit Danmarkimut nunanullu allanut nuuttut eqqarsaatigalugit, akileraarutit Nunatta annaasartagai ukiumut 40 million koruunit missaanniittut, Akileraartarnermut Atugarissaarnermullu Isumalioqatigiisitap naatsorsuutigaa.

Annaasat ikilisinniarlugit Akileraartarnermut Atugarissaarnermullu Isumalioqatigiisitap innersuussutigaa, soraarnerussutisianik katersinermi taakku akileraaruserneqartarnissaat utoqqalinermili tunniunneqarneranni akileraaruserneqassanatik, taamaaliornikkut Nunatta aningaasat annaasassai ikilisinneqassallutik.

Maliina Abelsenip aamma Thor Möger Pedersenip isumaqatigiinnerisa ammaappaa, soraarnerusutisiat qanoq iliornikkut akileraaruserneqarnissaat. Akileraaratarnermut Atugarissaarnermullu Iasumalioqatigiissitap innersuussutai malinneqassanersut, Aningaasaqarnermut Naalakkersuisup, Maliina Abelsenip maanngagaaq oqaatigisinnaannginnerarpaa.

- Siunissami nammineq aalajangiisinnaanissatsinnut periarfissiissaaq, aatsaalli sulisitsisunik, sulisartunik, politikkikkullu isumaqatigiinniutigineqaqqaassapput, tamatumalu kingorna Inatsisartunut aalajangigassanngorlugu, Aningaasaqarnermut Naalakkersuisoq, Maliina Abelsen taama oqarpoq.

Taassuma Thor Möger Pedersenip ataatsimeeqatiginerani oqallisaasa ilagivaat, Nunatsinni atugarissaalernissap aningaasalersorneqarnissaata unamminartortaat.