Soraarnerussutisiat pigiinnarlugit nuuttoqarsinnaassanngilaq
Danskit soraarnerussutisiatik pigiinnarlugit nunatsinnut Savalimmiunulluunniit nuussinnaalernissaat pillugu Dansk Folkepartip siunnersuutaa Folketingimit ippassaq oqaluuserineqarmat amerlanerussuteqartunit itigartitsissutigineqarpoq.
Soraarnerussutisiat pillugit ukioq naatinnagu nutaamik inatsisiliortoqarnissaa Dansk Folkepartip siunnersuutigisaa Atlantikup Avannaani Suleqatigiinnit, tassalu kalaallit savalimmiormiullu ilaasortaatitaasa taperseraluarpaat.
- Dansk Folkepartip Nunattalu assigiinnik soqutigisaqartarnerat qaqutigoortuummat, Dansk Folkeparti qujaffigiumavara, kalaallit savalimmiormiullu Danmarkimi soraarnerussutisiatik pigiinnarlugit angerlarlutik utoqqalisarsinnaanissat siunnersuutigimmagu. Lars-Emil Johansen oqarpoq.
Dansk Folkeparti isumaqarpoq, soraarnerussutisiat pigiinnarlugit sumulluunniit nuuttoqarsinnaasariaqaraluartoq, inatsisilli atuuttut naapertorlugit tamanna ajornarpoq. Nunat assigiinngitsut soraarnerussutisiat pillugit malittarisassaat nalinginnaasumik malinneqartaraluarput.
