Soraarnerussutisiaqartitsiviit soqutiginneqqilersut

Aatsitassarsiorluni suliniutit aningaasalersorniarneqarnerinut atatillugu nuannersumik nutaarsiassaqarpoq.
maajip 12-at 2014 08:33

Danmarkimi sorarnerussutisiaqartitsiviit aningaasaateqarfiillu aningaasalersuisartut tunuarsimaarsimagaluarlutik maanna nunatsinni aatsitassarsiorluni piiaavinnut aningaasalersueqataanissamut piumassuseqaqqilersimarpasipput. Tamanna aviisimi Berlingskemi ullumi saqqummersumi atuarneqarsinnaavoq. Milliarderpassuarnillu aningaasaliisoqaratarsinnaavoq.

Nunat avannarliit aningaasalersuinermut aningaaseriviata aamma Europamiut aningaasalersuinermut aningaaseriviata Nunatsinni annaaneqaratarsinnaasunik sivisuumik akilersugassanik taarsigassarsisitsisalissanerlutik aammalu inuussutissarsiutitigut suliniutinut appasissumik ernialersukkamik qularnaveeqqusiisalissanerlutik maanna isumaliutigaat.

- Kalaallit Nunaanni aatsitassarsiornikkut attaveqaatitigullu suliniutinut aningaasalersueqataanissamut soqutiginninnersut aperivagut. Aningaaserivinnillu taakkuninnga marlunnik oqaloqateqarnigut suli naammassineqanngimmata erseqqissumik oqaaseqarsinnaanngikkallarpunga, Danmarkimi Inuussutissarsiornermut Siuarsaanermullu ministeriaqarfimmi pisortaaneq Michael Dithmer Berlingskemut taama oqarpoq.

Soqutiginnittullu ilagaat soraarnerussutisiaqartitsivik PKA, aatsitassarsioqatigiiffinnik arlalinnik oqaloqateqartoq. Taakkulu ilagaat True North Gems, Qeqertrsuatsiaat eqqaanni rubinisiornermik aallartitsissaguni koruunit 100 millionit sinnerlugit katerseqqaartariaqartoq.

- Suliniutit pitsaasut pineqarpata Kalaallit Nunaanni aningaasaliinissatsinnut soqutiginnippugut, PKA-p pisortaanera, Peter Damgaard Jensen, Berlingskemut taama oqarpoq.

Soraarnerussutisiaqartitsiviit Nunatsinni aningaasaliinissaannut pisariaqarluinnartoq tassaavoq Nunatsinni naalakkersuinikkut allanngujaassuseqarnissaa. PKA-p pisortaa isumaqarpoq aningaasaliisartut anginerit aningaasaliiffigisinnaasaannik aningaasaateqarfiliortoqartariaqartoq. Kiisalu aamma danskit naalagaaffiata aatsitassarsiorluni suliniutinut tunngatillugu danskit naalagaaffiata killiliussanik patajaatsunik qulakkeerinninnissaa pingaaruteqartoq oqaatigaa.

- Aningaasaliissutit siammarterneqarnissaannik qulakkeerisinnaasumik aaqqissuussisoqarneratigut aatsitassarsiorluni suliniut ataasiinnaq naatsorsuutigisariaqassanngilarput, peqatigisaanillu danskit naalagaaffiata peqataaneratigut danskit kalaalillu soqutigisaasa ataqqineqarnissaat qulakkeerneqarsinnaassaaq, Peter Damgaard Jensen Berlingskemut taama oqarpoq.