Soraarnerussutisiaqartarneq allanngortilersaarpaat

Ukiuni aggersuni allanngortiterinissani soraarnerussutisiat aamma misissuataarneqassapput. Aningaasaqarnermut Naalakkersuisut Maliina Abelsen (IA) soraarnerussutisiaqartitseriaatsimik allaalluinnartumik siunissami takorluugaqarpoq.
Allattoq Noah Mølgaard
maajip 21-at 2012 11:35

Nunatsinni utoqqalisartut amerliartuinnavipput tamannalu siunissami Namminersorlutik Oqartussanut akisoorujussuanngorsinnaavoq. Amerlaqisut ullumikkut soraarnerussutisiassasut isumalluutituaat tassaapput pisortat tunniuttagaat.

- Inuiaqatigiit katitigaanerisa ukiuni qulikkaani aggersuni ilusissaat eqqarsaatigalugu soraarnerussutisiat pillugit sillimmartaarnissamut pissutissaqarluarpugut. Qujanartumik kalaallit amerlanerujartortut soraarninngornissaminnut ileqqaagaqartalerput. Kisianni aamma amerlasoorujussuupput sulinermi isumaqatigiissutit malillugit soraarnerussutisianut ileqqaagaqarnissamut periarfissaqanngitsut. Tamanna pillugu pitsaanerujussuarmik paasititsiniaasariaqarpugut taamaasilluta soraarnerussutisiat Kalaallit Nunaat tamakkerlugu oqaluuserineqartilerlugit, Maliina Abelsen oqarpoq, allanngortiterinissat aggersut ilusilersueqataaffigereerlugit.

Aalisartut piniartullu imminut sulisittut soraarnerussutisianut illuartiterinngillat. Tamanna pillugu oqallinneq maannagaaq aallartittariaqartoq Naalakkersuisut isumaqarput naak tamatuma allanngortinnissaanut siunnersuutip saqqummiunnissaanut ukiut arlallit suli ingerlasussaagaluartut. Taamaasilluni suliap tunulequtaqarluartumik suliarinissaa anguniarneqarpoq.

- Inuiaqatigiittut ornipparput piffissaq ukiut tamaasa 1 milliard koruuninik nassaarniartariaqarfissarput inuiaqatigiit ingerlanissaat qulakkeerniarlugu. 2040-up tungaanut kisitsisitigut siulittuutit taama oqariartuuteqarput. Tamatumanilu soraarnerussutisiat pingaarnertut oqaluuserinissaat pisariaqarpoq. Nunani allani nammineerluni soraarnerussutisianut ileqqaagaqartarneq ileqquuvoq, maanilu aamma taamaasiartuaarnissaa siunertaavoq. Taamaasiunngikkutta 2040-mi soraarnerussutisiaqartitsinikkut immitsinnut artukkertussaavugut, Maliina Abelsen oqarpoq.

Nunani allani soraarnerussutisiat amerlassusaat allanngorartarpoq soraarnerit aningaasaateqarnerit pissakinnernit pisortanit soraarnerussutisiaat ikinnerusarlutik. Nunatsinnili soraarnerussutit qanorpiaq ilusilersorniarneqarnersut suli oqaatigineqarsinnaanngikkallarpoq. Ataaserli nalunanngilaq, tassa allannguisoqartariaqarpoq. Allatut oqaatigalugu anguniagaq nalunanngilaq tassungali aqqutaa qanorikkumaarnersoq suli nalunarpoq.

- Isumaqarpunga pissaqarnerusugut siunissami soraarninngornissatsinnut ileqqaagaqarsinnaasugut. Taamaasilluta qulakkiissavarput utoqqaligutta naammaginartumik atugassaqarnissarput aamma taamaasilluni qulakkeerneqassaaq pissakinnerit naammaginartunik soraarnerussutisiaqarsinnaanissaat. Qulakkeertariaqarparput aalisartut piniartullu ataqqinartumik utoqqalinissaat. Kisianni uanga nammineerlunga isumaqarpunga inatsisiliunngikkaluarluni tamanna anguneqarsinnaasoq. Allannguinerilli taama pingaaruteqartigisut pineqartillugit innuttaasut tusarniaqqaarlugit allannguinerit aatsaat pisariaqarput, IA-kkormioq 35-nik ukiulik oqarpoq.