- Qinersisartunik annaasaqaataavoq: Soraarnerussutisiaqarnissamut aaqqissuussineq Inatsisartuni nutaamik oqallisigineqartoq

Soraarnerussutisiaqarnissamut pinngitsoorani ileqqaartussaaneq imaluunniit naamik?

Inatsisartuni oqallittoqaqqippoq. Pele Brobergip (N) soraarnerussutisianut aaqqissuussinermik atorunnaarsitsinissamut kingusinnerpaamik ukiakkut ataatsimiinnermi inatsisissatut siunnersuusiortoqarnissaa siunnersuutigaa.

Tamanna qinersisartunut neriorsuutinik imaluunniit taakkuninnga unioqqutitsinerit pillugit oqallittoqangaatsiarneranik kinguneqarpoq.

- Qineqqusaarutitik qimarratigaat, Pele Broberg Demokraatinut innersuussuteqarluni oqaaseqartarfimmit oqarpoq.

Inatsisartunummi siorna qinersisoqarmat Demokraatit Naleqqallu soraarnerussutisiassanut pinngitsoorani ileqqaartussaatitaaneq atorunnaarsinniarpaat.

Suliarineqarnerali maanna kinguarsarneqarpoq.

Nuannareqqusaarneq qinersisartunullu neriorsuutit

Soraarnerussutisianik ileqqaartussaatitaaneq pitsaasuusineq nalinginnaasumik suli isumaqatigiinngissutaavoq.

Siumup soraarnerussutisianut aaqqissuussineq 2016-imi atuutilersinneqartoq siorna qinersisoqarneratulli suli pisariaqartuusoraa.

- Isummatsinnik aalajangiusimavugut, kisianni qinersisartunik annaasaqaataangaatsiarpoq, Siumup siulittaasorisimasaa, Erik Jensen ullumi ataatsimiinnermi oqarpoq.

Naleqqap tassani isumaqatiginngilluinnarpaa.

- Innuttaasut soraarnerussutisiassaminnut atatillugu namminneq aalajangiisinnaatitaanerannik arsaarneqarput. Tamanna partiitsinnit uggoraarput, Jens Napátôk (N) oqarpoq.

Nunarput namminiilivinnissamut sulissuteqarniaruni soraarnerussutisianut pinngitsoorani ileqqaartussaatitaaneq pisariaqartoq, Siumut oqarpoq:

- Una pillugu neriorsuutinik attassinerput uggorinngilarput. Siunissaq namminiilivinnissarpullu eqqarsaatigalugit pisortanit pisariaqartitsinnginnerulertoqarnissaanut taama ittumik aaqqiissuteqarnissaq pingaaruteqarpoq, Erik Jensen oqarpoq.

Taassuma partiit allat qinersisartunut piviusorsiunngitsumik oqaaseqarnerarpai:

- Soraarnerussutisianut aaqqissuussinermik sukkasuumik atorunnaarsitsinissaq qinersisussaqartitsingaatsiarpoq. Uagut isummatsinnik oqaatiginnippugut, nuannareqqusaarnerlu una eqqortumik aqqutissaanngissoraarput.

Naallu Jens-Frederik Nielsenip (D) Demokraatit pinngitsaaliissummik soraarnerussutisiaqalernissamut ukiunik atorunnaarsitsiniartut siorna qineqqusaarnermi oqaatigigaluaraa sulilu taamaaliortoqanngitsoq taassuma partii eqqunngitsumik oqaaseqarsimanngissoraa.

- Qineqqusaarnermi pingaartitagut aalajangiusimavagut, aamma immikkut ilisimasalinnik eqimattanik suliniutinillu assigiinngitsunik aallartitsisoqarpoq – taamaammat neriorsuutitsinnik attassinngitsugut oqartoqarsinnaanngilaq, Margrethe Thaarup Andersen (D) oqarpoq.

Immikkut ilisimasallit eqimattat

Naalakkersuisut siunissami soraarnerussutisianut pilersaarutinik misissuisussanik, immikkut ilisimasalinnik eqimattamik siorna aggustimi pilersitsipput.

- Soraarnerussutisianut aaqqissuussinerup kukkunerunerarneqarnera isumaqatigaarput, taamaammat unitsikkallarparput, taamaalilluta soraarnerussutisianut nutaamik aaqqissuussinissamut suliaqarnissamut piffissaqassalluta, Pipaluk Lynge (IA) ataatsimiittarfimmit oqarpoq.

Aningaasaqarnermut naalakkersuisup, Aqqaluaq Biilmann Egedep (IA) naammagittarsinnaassuseqarnissaq aamma pisariaqarsoraa:

- Sammisaq naammassisussaavarput, taamaammat immikkut ilisimasalinnik eqimattaliornikuuvugut, taanna oqarpoq, itisiliillunilu:

- Immikkut ilisimasallit eqimattaat naammassippat partiit tamarmik soraarnerussutisianut aaqqissuussinissamik oqalliseqatigiumaarpakka.

Naleqqalli immikkut ilisalimmik eqimattat utaqqeqqaartariaqarnera paasisinnaanngilaa.

- Suliamut ilisimasalinnik ilumut eqimattaliortoqaqqaassava? Jens Napátôk (N) aperivoq.

Naalakkersuisut kingusinnerpaamik ukioq manna ukiakkut ataatsimiinnissamut inatsimmik misissuinissaannut Pele Brobergimit siunnersuut 16-init itigartitsissutigineqarpoq, arfineq-pingasuniillu akuerineqarluni.

Immikkut ilisimasallit eqimattaat kingusinnerpaamik ukiup ingerlanerni piareernissaa naatsorsuutigineqarpoq.