Soraarnerussutisiaaruttarneq allanngortikkumavaat
Danmarkimi kalaallit danskillu pisortanit soraarnerussutisiallit nunatsinnut nuunnerminni soraarnerussutisiaminnik annaasaqartarnerat allanngortittariaqartoq, Dansk Folkeparti isumaqarpoq.
Isuma tamanna Siumumit taperserneqarpoq.
- Kalaallit angerlarusukkaluarlutik mikineroqisumik pisartagaqalernissartik pillugu Danmarkimiiginnartarnerat allanngortinniarlugu siunnersuut taperserusuppara, naleqqulluartutullu isigalugu. Siumumeersoq Inatsisartunut ilaasortaq Enos Lyberth oqarpoq.
Danmarkimi pisortanit soraarnerussutisiarisartakkat nunatsinnut naleqqiullugit qaffasinnerupput, Danmarkimiillu nunatsinnut nuuttartut pisartakkatik annaasarpaat, nunatsinnilu appasinnerusumik soraarnerussutisiaqalersarlutik.
Kalaallit Danmarkimiittut utoqqalinersiatik pigiinnarlugit angerlarusukkaluartut nunatsinni soraarnerussutisiat appasinneruneri piinnarlugit uniinnartarnerat taamaattariaqanngikkaluartoq, Dansk Folkeparti isumaqarpoq.
Danmarkimi pisortanit soraarnerussutisiaqalersimasut pisartakkatik pigiinnarlugit nunanut allanut nuussinnaatitaareerput, tamannali naalagaaffeqatigiinnerup iluani atorneqarnani.
