Soorlu ipitikkiartorneqartut

Qaammatialunnguillu matuma siorna, Namminersorlutik Oqartussat takoqqusaarutinut akit atuuttut ilanngaaserujussuaqqummagit, aviisit aningaasatigut ajornartorsiungaalereersut, naaggaartariaqarsimapput. Taamanili pisortanit sulisussarsiorlutik aviisikkut takoqqusaarutiliisarnerit takussaajunnaaraluttuinnalersimapput.

- Namminersorlutik oqartussat piumasaraat takoqqusaarutinut akigitittakkagut naliginnaasut 60-70 procentimik ilanngaasertassagigut. Taamaattoqarsinnaanngilarli, taama oqarpoq Sermitsiami aaqqissuisuuneq Poul Krarup.

Suliffeqarfimmik ataavartumik ingerlassisoqarsinnaanngilaq, akigititat naliginnaasut taama annertutigisumik ilanngaasersorneqartassappata.

Sermitsiaq.AG-mi siulersuisuni siulittaasoq Jørgen Ejbølip namminersorlutik oqartussat periuusaat pissaanermik atornerluinertut nalilerpaa:

-Taama annertutigisumik akikinaariniarsarineq ingasaginarluinnarpoq. Namminersorlutik Oqartussat pissaanertik taamatut atorniarsarisaraat , siulittaasutut uanga tamanna ingasagaara. Isumaga malillugu pissaanermik atornerluineruvoq.

siulersuisuni siulittaasoq Jørgen Ejbøl oqarpoq nangillunilu:

-Apeqqusernarsivoq Namminersorlutik Oqartussat Air Greenlandimut, ISS-imut, suliffeqarfinnulluunniit allanut, akinik taamak annertutigisumik appaanissaq piumasarisarneraat. Suliffeqarfinni allani akigititat naliginnaasut 60 procentimik ilanngaaseqquneqartarnerlutik aamma?

Pisortat maanna sulisussarsioraangamik qallunaat nittartakkatigut sulisussarsiortarfii atortarpaat. Ukioq kingulleq tamanna Sermitsiap Atuagagdliutillu takoqqusaarutiliisarnermit isertitanit 8 millionit koruuninik annaasaqaatigaat.

Tamannalu soraarsitsinernik kinguneqarsimavoq.

Aviiseqarfinnilu taakkunani aaqqissuisoqarfinni sulisorpassuit soraarsitaanikuupput.

Kalaallit Nunaannilu aviisit nuna tamakkerlugu saqqummertartut siunissaat qaamavallaanngilaq:

- Tuniniaasugut atorluarlugit inuppassuit aviisitsinnut annoncemik ussassaarummilluunniit ilanngusseqqusarpagut, tamanna sulissutigisorujussuuarput.

Sipaarfigisinnaasagut sipaarniarfigisarpagut, ajornakusoornartitattalu annersaraat, aviisip naqitertittarnera sipaarfissatuarileratsigu, taamaammat Islandimi naqiterititsisalernissarput eqqarsaatersuutigaarput.

Poul Krarupip oqaatigaa aviisit Namminersorlutik Oqartussallu akit pillugit isumaqatigiinniarnerat massakkut ingerlasut.