Sooq saassussinersoq suli nalunarpoq

Sooq saassussisoqarneranik paasiniaaneq, qanorlu qisuariartoqassanersoq, nunani arlalinni FN-imilu attaveqaatinik ingerlarsortitsivoq.

Maanna USA Korea Kujallermut sorsuummik timmisartut mittarfilimmik aallartitsivoq, akerleriinnermulli sakkortusaataanngitsoq, DR-ip Washingtonimi ilanngutassiortua Steffen Gram isumaqarpoq.

USA Korea Kujallerlu iligiittut aamma USA-p Korea Kujalleq illersussagaa, Obama oqariartuuteqarpoq, taamalu oqarnera Korea Avannarlermut qanoq isumaqarnermik oqariartuutaavoq.

Taamaliornerlu aamma Kinamut nalunaarutaavoq, tassami amerikamiut Kinap killeqarfianiinnerat Kinamiut akueriinnartariaqarpaat. Kinamiulli tamanna nuannarinavianngilaat.

Kinamiut Korea Avannarlermut killiliissanersut piffissami qaninnermi paasissavarput, kisiannili taamaaliorsinnaassanerat ilimanarpallaarani.

Sooq Korea Avannarleq saassussinersoq suli nalunarpoq. Korea Avannarliummi namminneq eqqarsartaasertik malippaat. Imaassinnaavoq kingornussisussat tulleriiarnerannut attuumassuteqartoq, Kim Jong-ilip ernera generalinngoqqammerpoq, aalajangeriataallaqqissutsinilu akkutuunut takutikkusussimasinnaallugu.

Aamma USA-mut ima nalunaarniarnerusinaavoq: tusaalaariaritsi, tammarnavianngilagut, ilumoorutilaartigut isumaqatigiinniaqatigalutalu.

Obamalli naalakkersuisuisa Korea Avannarleq isumaqatigiinniaqatigiumanngilaat.