Sooq nannuttaq Ilulissaniitinnarneqanngila?

Nannup Ilulissani ippassaq pisarineqartup Namminersornerullutik Oqartussanit tiguneqarnera Ilulissat borgmesteriata Anthon Frederiksenip uparuarpaa.

- Nanoq pisarineqarfimmini Ilulissani- qanga kingullermik Ilulissat eqqaani nannuttoqarsimaneranik eqqaasitsitsissutitut- illoqarfimmi pisortaqarfiit ilaanni kusassaatissatut takussutissiissutigineqartariaqarpoq.

Aamma neqaa utoqqaat illuanut pisortaqarfinnullu allanut maani agguaanneqartariaqarpoq. Qeqqaniit aqutsineq taamaatittariaqarpoq.

Aamma taamaliornikkut aningaasarpassuit sipaarneqarsinnaammata eqqaamasariqarpoq, Anthon Frederiksen allappoq.

Nannup neqaa Ilulissani pisortaqarfinnut tunniunneqassasoq amia niaqualu Namminersornerullutik oqartussanut ingerlatinneqassasoq, Piniarnermut Pisoartaqarfimmi allaffimmi apisortaq Ole Heinrich avisimi Sermitsiami issuarneqarpoq.

Nanoq marlunnik affarmillu utoqqaassusilik Ilulissani inuussutisalerisunit maanna misissorneqarpoq.

Nannup amia niaqualu Namminersornerullutik Oqartussat tuniniarsinnaanngilaat amiatali pitsaassusaa naapertorlugu aggoriarlugu sinerissami ammerivinnut tunniunneqarsinnaavoq, niaqualu tunissutissiarineqarluni.

Ilulissani nanorsiaq eqqaaveqarfimmut qanittumi pisarineqarpoq, inuttaasunullu navianartorsiortitsisinaasutut nalilerneqarami toqunneqarluni.