Somaliamiut ujajaaniartartut ilungersunartorsiulerunarput

Somaliamiut umiarsuarnik assartuutinik Adenip kangerliumarngani ujajaaniartartut ilungersunartorsiulerunarput. Russit sorsuutaata ujajaaniat angallataat pingasut ullumi tigusarisimavaat, aamma sapaatip akunnerani matumani Amerikamiut sakkutuuisa umiartortut, ujajaanianik 16-inik tigusarinnissimapput.
februaarip 13-at 2009 12:50

Adenip Kangerliumanersuani Somaliamiut umiarsuarnik assartuutinik ujajaaniartartut mianersornerusariaqalerput, tassami tamaani ujajaanianut iliuuseqarniarneq iluatsikkaluttuinnarmat. Russit sorsuutaasa ilaata ujajaaniat angallataat pingasut qulinik inuttallit ullumi tigusaraat. Aamma ippassaq Amerikamiut sakkutuuisa ujajaaniat qulingiluat tigusaraat, taamaalillutillu sapaatip akunnerata ingerlanerinnaani ujajaaniat 16-it tigusaralugit.

Ujajaaniat amerliartuinnartut tigusarineqartalernerannut peqatigitillugu, ujajaaaniat sakkortunerusumik pissusilersorfigineqalerput. USA ujajaanianik tigusaminik Kenyamut tunniussisarnissaminik isumaqatigiissuteqarsimavoq. Ujajaaniat Kenyami eqqartuussivimmut sassartinneqassapput. Amerikamiut ujajaaniat tigusarisatik umiarsuarmut sorsuummut qulimiguulimmik ingerlateqqittarpaat.

Adenip Kangerliumanersuani januaarip aallartilaarneraniit umiarsuit 22-t ujajaanianit saassunneqartarput pingasullu tigusarineqarlutik.