Somaliami qaartartumeerineq alianartoq
Nakorsat Somaliamiut naammasserlaat nalliuttorsiutigineqarneranni imminut pilliutigaluni qaartartumeerisoq imminut qaartippoq inuillu 19-it toqullugit, taakkunannga ministerit pingasut nakorsallu naammasserlaat nunami ineriartortinneqartumi amigaataaqisut. Eqqarsaatigiinnarlugu qamuuna annernarpoq. Qaartartumeerineq, Somaliami naalakkersuisunut FN-imit tapersersugaasunut sanngiitsunut nutaamik saassussineruvoq.
Suna tamarmi paatsiveerusimaarfiuvoq, toqungasut timillu pisatai qaartinneqarsimasut, qaartartumeerisoq arnatut atisalersorsimasoq Mogadishumi hotelersuarmi imminut qaartimmat. Tamanna nakorsat naammasserlaat nalliuttorsiutigineranni, Somaliami, 1991-imiilli iluamik atorsinnaanngitsunik naalakkersuisoqarsimasumi qaqutigoortuugaluarpoq. Somaliami qaartartumeerineq taanna juunip kingornagulli sakkortunerpaavoq, islamistit suliniaqatigiiffiannit Al Shababimeersunit Somaliap isumannaallisaanermut ministeria inuillu allat 30-t toqutaammata illoqarfimmi Belet Uengimi hotelimi imminut pilliutigaluni qaartartumeerinikkut.
Imminut pilliutigaluni qaartartumeerinermi ullumi pisumi suli ataasiarluni uppernarsineqarpoq Somaliami muslimit ingasattajaarniat sheik Sharif Ahmedip naalakkersuisuinut, Somaliami annikitsuararsuarmik taamaallaat nakkutilliisunut sukkulluunniit iluarisannguaminnik saassusseriaannaasut.
Nunap sinnera muslimit ingasattajaarniat oqartussaaffigaat. Al Shababip siornatigut Afrikami sakkutuut eqqissisimatitsiniartut Mogadishumi aallaaviat annerpaaq saassuppaat, taakkualu aamma Ugandami Burundimilu illoqarfiit pingaarnersaasa sassunneqarnissaat sioorasaarutigalugu, nunallu taakkua tassaapput Somaliami Afrikamiut sakkutuuinik ikiuisut.
USA-p Al Shababikkut peqqarniisaarnianut Al Qaidakkunnut attuumassuteqarsorai, neriuutigisimagaluarlugulu muslimip ingasaassiniartuunngitsup nunami tassani pisortassatut januaarimi qinigaasup Somaliap klaninik immikkoortunillu isumaqatigiinngissuteqarnera iluarsiivigissagaa, taamatulli pisoqarsimanngilaq, akerlianilli Somalimi peqqarniisaarniarneq annertusisimavoq ullumilu qaartartumeerinermi uppernarsineqarluni, Somalia inatsisaatsuliorfiusoq suli ajornerulersimasoq.
