Somaliami meeqqat amerlanersaat atugarliortuupput

juunip 22-at 2006 17:22

Somaliami sakkuaattarnerit panernersuaqartarnerillu ukiorpassuarni atuuttarnerisa kingunerisaannik meerarpassuit kaattut atugarliortullu tamaani inuupput.

Naalagaaffiit peqatigiit Meeqqanut Aningaasaateqarfia, UNICEF, Somaliami meeqqat atugaat pillugit ukioq manna januaarimiit maajip tungaanut qulingiluariarlututik misissuisimapput.

Somaliami meeqqat tamarmik 15-miit 27 procentii iluamik nerisassaqanngillat. Tammanalu naammagani – UNICEF naapertorlugu meeqqat nerisassanik, nakorsaatinik allanillu atorfissaqartitsisut 90 procentii ikiorneqariarsinnaanatik inuupput.

Nunarsuarmi sumiluunniit meeqqat 15 procentii naammatunik nerisassaqanngippata kimilluunniit akuerineqarsinnaaneq ajorpoq – taamaammat Somaliami meeqqat 27 procentiisa taama atugaqartinneqarnerat ajortorujussuuvoq.

- Somaliami kaanneq nerisassaqannginnerlu nunarsuarmi ajornerpaatut nalilerneqarsinnaapput – aamma Darfurimi, Christian Balslev-Olesen, Naalagaaffiit Peqatigiit Somaliami Aningaasaateqarfiani pisortaasoq, oqarpoq.