Somaliami arsaattulereqqusaanngimmat toqutaassutigaat
Toqutaasut tv-kkut nunarsuarmi arsaannermik pissartanngorniuttumik isiginnaarsimanertik pissutigalugu toqutaapput. Tassami timersornermi pisut isiginnaarnissaat Afrikami nunat ilaanni tassani inerteqqutaammat.
Taamaattumik sakkutuut kiinnamikkut assiaqutallit suliniaqatigiiffimmit Hizbul Islamimeersut nunap ilaani Agoi-mi, illoqarfiit pingaarnersaata Mogadishup kujataaniittumi, ataasinngormat illunut arlalinnut iseqattaarput. Tassa tamaani najugallit fjernsynikkut arsaalluni VM-ertoqarneranik isiginnaarnersut uppernarsiumallugu.
- Hizbulikkut inunnik marlunnik toqutsipput allallu 35-t tigusaralugit, tamarmik arsaattunik VM-ertunik nuannarisallit, inuit pisinnaatitaaffii pillugit suliniaqatigiiffimmi Elman-imi siulittaasup tullia Ali Yasin Gedi oqarpoq.
Muslimit ingasattajaarniat Somaliap ilarujussua nakkutigaat. Taakkua upperisaq islam namminneq periaasertik atorlugu nassuiarniartarpaat ilaatigullu timersorneq, nipilersorneq qitinnerlu inerteqqutigalugit.
Nunap ilaani taakkunani najugallit inerteqquteqartoqarnera soqutiginngilaat, isertorluinnarlutillu nunarsuarmi timersornikkut pisimasut pingaarnersaat qaammataasakkut tigooraassutit nammineq sanaat atorlugit isiginnaartarlugu.
