Solaari Kulusummi pinngortitamik mingutsitseqaaq

Solaari Kulusummi mittarfeqarfimmeersoq pinngortitamik mingutsitseqaaq. Piniartunik aamma ajornartorsiortitsivoq. Kulusummi mittarfeqarfiup pisortaa Benny Mouzynsky ippassaq radioavisimut oqaraluarpoq, solaari aalannguuttarmat uumasunut sunniuteqarsimagunanngitsoq. Tamannali eqqunngilaq. Puisit meqqillu piniagaaleruttorfianni Kulusummit avammut kilometererpassuit uumasunik takkuiunngitsoq, piniartoq, Kulusummilu nunaqarfiup aqutsisuini siulittaasoq, Pele Maratse, oqarpoq. Sikorsuit Ammassallip kangerluanut takkuteruttorfiani orsussamik seerisoqarnera qanoq paaseqqaarneritsik pillugu Pele Maratse ima oqaluttuarpoq:

-Tassa sapaatip-akunnera kingulleq takornarianut umiatsiaaqqat arfineq-marluusugut maanga nunaqarfitsinninngaanniit mittarfeqarfiup tungaanut angallassigaluaratta siku tikinneq ajornarami. Tassunga mittarfimmi tulattarfiup tungaanut immaqa 5-600 meeterit missaaniikkami taanna sikuminertaq, tulattarfimmut akunnissimalluni. Taava ikiartulernitsinni takuarput imaq anorsaalaaraluarluni imaq qatsuissimasoq. Sunaaffa gasoliap anianera imartamut siammartilersimasoq, Pele Maratse oqaluttuarpoq.

- Umiatsiaaqqat tamatta takuarput siku tamarmi qallerneqarsimasoq. Taamaammat angallassisuusugut tupassimavugut susoqarsimanersoq. Tulattarfik tikinngitsoorlugu aallaqqiinnarsimavugut, taanna siku tulattarfiup tungaani tikiffigiuminaammat. Uteqqiinnarsimavugut, nangippoq.

Pele Maratsep takornarissanillu angallasseqataasa takusartik mittarfiup pisortaanut nalunaarutigaat, kingusinnerusukkullu ilisimatinneqarput ruujorit aputip ataaniittut ilaat napisimasoq. Uuliaarluernerli annertunngimmat susoqartariaqarsorisimanngilaat, solarolia aalannguulluni suujunnaarumaarmat.

-Ilisimateqqaaraluarpaannga kukkusumik, tassa 28.000 liiteri aniasimasoq, kisianni kingusinnerusukkut uppernarsivarput 100.000 liiteringajak aniasimasoq. Isumaqarpunga pissutsit taamaattut akueriuminaatsut, taama annertutigisunik mingutsitsineq pisimammat. Nunaqarfimminngaanniit 6-7 kilometerit missaanni uulia immap qaava mingutsillugu nunaqarfitta avatinnguaniippoq. Piniagassat, puisaanerusut, piniaartut oqarnerat tunngavigalugu suligooq puisimik ingerlaartumik takusaqaqqittoqarsimanngilaq. Sulilu sarfarsiataarpoq silammut.

Tassa nutaartugassaaqaanngivippisi?

- Ullaap tungaa umiatsiaaqqat ilaat tikittoq aperigaluarpara. Kanunga avatitsinnut angalaarsimallutik puisinniaraluarlutik takusimanatik oqarpoq, aappaalu oqarluni puisit marluk ippassaq takusimagaluarlugit ungasiarlugit, kisianni pisarinngitsoorlugit. Tassa taamaattoqarpoq. Qularinngilara mingutsitsineq tipittoq taama sakkortutigisoq, puisit silatugamik ornissinnaanngikkaat.

Pele Maratse, Kulusummi aalisartut piniartullu peqatigiiffianni aamma siulittaasuusoq taama oqarpoq.

Kommunimi teknikkimut allaffeqarfik saaffigineqareerpoq. Qatserisartut pisortaat politiillu uuliaarluernermik ullumi alakkaapput. Paasivaat ruujori nivattaassuit apriilimili ajoqusersimassagaat, apuullu aattulereriarmat solari 89.500 liiteri immamut maanna sitserutilersoq. Rapportiliorput, iliuuseqarseqartoqarsinnaanngilarli, sikorsuit maanna Ammassallip kangerluanut pulammata.