Solaari CO2-mik aniatitsinerpaavoq

Kyotomi isumaqatigiissut nunatsinnit malinneqassappat, CO2-mik aniatitsineq 1990-imi annertussusaanut naleqqiullugu 8 procentimik appariartinneqartariaqarpoq, tamannalu 2012 naatinnagu pisariaqarluni. Nunatsinni nukimmik atuineq tamarmiusoq, Naatsorsueqqissaartarfiup nalunaarusiamini 2008-mi januaarimi saqqummersumi naatsorsoqqissaarsimavaa.

Nalunaarusiami takuneqarsinnaavoq, 2007-imi CO2-mik aniatitsineq tamarmiusoq 64.000 tonsit sinneqalaartoq. Taanna aallaavigineqartumut 1990-imut naleqqiullugu 2 procentinik qaffasinneruvoq. Tassa aniatitsineq qaffariarsimavoq, tamannalu Kyotomi isumaqatigiissut najoqqutaralugu, 8 procentinik appariartitsinissamut naapertuutinngilaq.

Taamaattorli nalunaarusiami aamma oqaatigineqarpoq, nukissiuutit ataavartut, soorlu erngup nukinganik nukissiorneq 1993-imiit qaffariartuinnavissimasoq. Tassami 1993-imi erngup nukinga atorlugu nukissiorfik siulleq Utoqqarmiut Kangerluarsunnguanni aallartinneqarpoq, tullialu Tasiilami 2005-imi aallartinneqarluni, taamalu ataavartumik nukissiorneq 10 procentimik qaffariartillugu.

Naak ataavartumik nukissiornikkut solaarimik atuineq minneruleraluartoq, solaari tassaavoq CO2-mik aniatitsinerup annertuseriarneranut patsisaasoq. Nalunaarusiamilu oqaatigineqarpoq, nunatsinni inuussutissarsiorneq 1990-imut sanilliullugu qaffariarsimammat aamma CO2-mik aniatitsineq qaffariarsimasoq.

CO2-mik aniatitsineq inuussutissarsiutinut assigiinngitsunut agguataaraanni, tunisassiorneq pingajorarterutip missaanniippoq, innaallagissiorneq kiassarnerlu tallimararterutaalluni kiisalu angallanneq angerlarsimaffinnilu atuineq pingajorarterutaalluni.