Sofie Petersen qinigaavoq

Kalaallit Nunaanni biskoppi, Sofie Petersen, Nunarsuarmi Oqaluffiit Siunnersuisoqatigiivinut qinigaavoq. Siunnersuisoqatigiit qitiusumik ataatsimiititaliaanni peqataanissaminnut nunap inuii taamaalillutik periarfissaqarnerulerput, aviisi Danmarkimi ullormut saqqummersartoq, Kristeligt Dagblad, ullumi saqqummersoq allappoq.

Nunarsuarmi Oqaluffiit Siunnersuisoqatigiivi nunarsuaq tamaat atuupput, oqaluffinnit nunani assigiinngitsunit 100-ut sinnerlugit amerlassusilinnit ilaasortaaffigineqarlutik. Sofie Petersenip toqqagaanini nuannaarutigaa.

- Qinigaanera nuanneqaaq, nunap inuiinut tunngassuteqartunik suliaqarnissannut taamaalillunga sapiinnerulerpunga, Sofie Petersen Kristeligt Dagbladimut oqarpoq. Kalaallit Nunaat nunaavoq killilersugarujussuaq, oqaatsit nunallu pissutaa pissutigalugit nunarsuarmi nunap inuiisut allatulli ajornartorsiuteqanngitsoq.

-Qinigaanera Kalaallit Nunaannut iluaqutaassaaq, nunap inuiinut tunngassuteqartut Naalagaaffiit Peqatigiit aqqutigalugit tusartuaannarpavut, oqaluffilli maanna sulinermut ilannguppoq. Kisimiinngitsugut paasineqassaaq, Sofie Petersen oqarpoq.

Sofie Petersenip qinigaanerani siunnersuisoqatigiinni ilagiit oqaluffiinit ilaasortat marlunngorput, Københavnimi domprovsti, Anders Gadegaard aamma qinigaammat. Ataatsimeersuarneq Brasiliami Porto Alegremi sapaatip akunnerani uani ingerlanneqassaaq.