Sofie Petersen: Naapiffeqartariaqarpugut

- Mingutsitsineq tamatsinnik eqquisoq pineqartillugu nunat killeqarfii aningaasarsiornermullu tunngasut eqqarsaatigisariaqanngilavut. Nunarsuarput ataatsimoorluta inuuffigaarput. Taamaattumik naalakkersuinikkut upperisarsiornikkullu assigiinngissuteqaraluarluta naapiffeqartariaqarpugut iliuuseqaqatigiillutalu, biskop Sofie Petersen allappoq.

- Ukiuni kingullerni nunarsuatsinni sila allanngoraluttuinnarpoq, kikkullu tamarmik silap pissusaata allanngoriartorneranit sunnerneqarput. Soorlu maani sermersuaq aakkiartorpoq. Soorlu februaarip upernaarpalaarnera misigereerparput, naak qaammat taanna nunatsinni issinnerpaaffiusaraluartoq, Sofie Petersen oqarpoq, – tamattalu ataasiakkaarluta – Guutip tunissutaata, tassa pinngortitarsuup qanoq atornerlunneqartiginera uniimilluta eqqarsaatigeqqullugu kajumissaarluta.

Sofie Petersenip innersuussutigaa, ukiualuit matuma siornagut upperisarsiortuni allani qullersaasut qulit ilagalugit Kitaani angalaarnertik.

- Umiarsuarmut ilaalluta sermersuup uukkaaffiata eqqaaniitilluta pinngortitaq pillugu nammineq oqaatsivut atorlugit qinoqatigiippugut tussiarlutalu, Sofie Petersen allappoq.