Sofia Geisler KNI A/S-imi attaveqaqatigiinnermut pisortatut atorfinippoq

Sofia Geisler 2011-miit maannamut Namminersorlutik Oqartussani tusagassiisarnermut pisortatut atorfeqarpoq. Sofia Geisler tusagassiortutut ilinniarsimasuuvoq ukiunilu arlalinni tusagassiisarnermut pisortatut atorfeqartarsimavoq, soorlu Royal Greenlandimi aamma Qaasuitsup Kommuniani. Sofia Tusagassiortunngorniat ilinniarfianni ukiuni arfineq marlunni pisortaasimavoq.

Sofia Geisler aamma KNI A/S-ip siulersuisuini piffissami 2009-2012 ilaasortaasimavoq.

- Ukiuni kingullerni pingasuni KNI namminerisaminik attaveqaqatigiinnermut immikkoortortaqarfeqarsimanngilaq, suliassalli ataasiakkaat tusagassiisarnermi siunnersortinut Danmarkimiittunut assigiinngitsunut imissutigineqartarsimapput. Tamanna maanna allanngortipparput. KNI-p angissusia inuiaqatigiinnilu pingaaruteqassusia eqqarsaatigigaanni, suliffeqarfissuup kiffartuussinermini inuiaqatigiinni inuuniarnikkut atugassarititaasut qanimut ilisimaaralugit aallaavigalugillu suliffeqarfiup iluani avatangiisiminullu attaveqaqatigiinnerup tungaatigut isumaginninnissaa pisariaqarluinnarpoq, KNI-mi pisortaanerugallartoq Peter Grønvold Samuelsen oqarpoq nangillunilu:

- Qularutiginngilara suliassaq taamaattoq Sofia Geislerip sapersaatiginagu isumagilersinnaagaa, KNI-mimi 1.000-it miss. sulisoqartumi suliffeqarfiup iluani pitsaasumik uummaarissumillu attaveqaqatigiinnerup tungaatigut isumaginnittoqartariaqarpugut, sulisorpassuatta ulluinnarni sulinerminni ikorfartorneqarnissaat aamma eqqarsaatigalugu, KNI A/S-imi pisortaanerugallartoq Peter Grønvold Samuelsen taama oqarpoq.