Sodavanditortarneq killilerniarneqarpoq
Meeqqat qanoq annertutigisumik sodavanditorsinnaasassanersut Folketingimi ilaasortat amerlanerussuteqartut pisortatigoortumik killeqartikkusuppaat. 18-it inorlugit ukiullit liiterip affaanik sapaatip-akunneranut sodavanditortarnissaat siunniunneqarpoq.
Uummat pillugu peqatigiiffiup siunnersuutigimavaa, 18-it inorlugit ukiullit liiterip affaa sinnerlugu sodavanditortassanngitsut inassutinngortinneqassasoq. Peqatigiiffiullu siunnersuutaa, Radikalenit, Socialdemokratinit Venstrenillu tapersersorneqartoq, DR-ip tusarliuppaa.
- Angajoqqaat meeqqatik qanoq annertutigisumik sodavanditortassanersut taamaalillutik aqussinnaanerulissavaat, Radikalet oqaaseqartartuat Charlotte Fischer tunngavilersuivoq.
Taamaattumik peqqissutsimut ministeri Lars Løkke Rasmussen aperiniarpaa, meeqqat sodavanditortarnerat qanoq ilillugu killilerniarneqarsinnaassanersoq. Nunatsinni peqqissutsimut pisortaqarfiup paasissutissaatai naapertorlugit meeqqat aqqanilinnit 17-it tungaannut ukiullit pingajorarterutaat ullut tamaasa sodavanditortarput.
