Sodavandit aalakoornartortallit tunisaajunaaqquaat

Inuusuttut Nuummi imigassamik atuinerat allanngormat, inuusuttullu akunnerminni persuttaanneruleriartormata, Nuummi kommunalbestyrelsip naalakkersuisunut inassutigilersaarpaa siunnersuutigilersaarlugulu, sodavandit aalakoornartunik akullit nunatsinni nioqqutaajunnaarnissaat.

- Taakkua sodavandit aalakoornartunik akullit tunisaalernerata kingorna, takusinnaalersimavarput inuusuttut imigassamik atuinerat allanngortoq. Taakulu inuusuttunit sodavanditut imerneqartarput, taamaalillutillu sukkassoorujussuarmik aalakuulertarlutik. Taamaattumik ajornartorsiutaalersoq takusinnaaleratsigu kommunalbestyrelsemit siunnersuutigaarput imigassat sodavndit aalakoornatullit tuniniarneqartarunnaarnissaat siunnersuutigisariaqarlutigu. Kommunalbestyrelsillu suliakkippaannga naalakkersuisunut saaffiginnissutigissagiga nioqqutigineqarnerat inatsisinngorlugu inerteqqutaalertariaqartoq.

Nuup Borgmesteria Agnethe Davidsen aamma oqarpoq imerniartarfiutillit ataatsimeeqatiginerani paasitinneqarsimallutik inuusuttut sodavandinik aalakoornartunik imersimatillutik pissusilersuutaat allanngorsimasut.

- Suulluunniit ajoqutaasut paasineqaraangata pisortanit unitsinneqarsinnaasariaqarput, Nuup borgmesteria oqarpoq.

Imigassat aalakoornartullit tuniniaqqusaajunnaarneqassappata inatsisartuni aalajangiiffigineqartigani oqaluuserineqaqqaasaaq.

Siumut anorersuarsiortinneqarunnaarli

Inatsisartut Aningaasaqarnermut Ataatsimiititaliaata siulittaasulerneqarneranut atatillugu partiip Siumup immikkoortortai isorinnittut amerliallaqqipput, Siumut Uummannami immikkoortortaa ilanngummat.

Siumut sinnerlugu Nalaakkersuisuni ilaasortaasimasup Simon Olsenip Aningaasaqarnermut Ataatsimiititaliami siulittaasunngortinneqarneranut atatillugu pisut akuersaarneqarsinnaanngitsut Siumup Uummannami immikkoortortaani siulittaasoq Jens Trolle nalunaarpoq.

Pisut kingulliit tunngavigalugit Siumut partiip ukiuni kingullerni anorersuarsiortinneqartutut inissinneqartarnera, Uummannami Siumup immikkoortortaata naammagileraa Jens Trolle oqarpoq.

- Naalakkersuisut aammalumi partiip siulittaasuata pisut pillugit Siumut immikkoortortaqarfiinut nalunaaruteqarnissaa taamaattumik kissaatigaarput Jens Trolle oqarpoq.

KODA kingumut nersorinneqqippoq

Nipilersortartut nunatsinneersut nersorniarlugit KODAp Katuami ippassaq unnukkut toqqarpai.

Kodap ataqqinaammik nersorniarpaa Paamiormiu Enok Poulsen. Enok Poulsen ukiut 20-t sinnerlugit nipilersortartuuvoq, saqqummersitaqaalullunilu. Saqqummersitaalu nunatsinni inuppassuit ilisimallualerpaat, Enok Poulsenip taalliai eqqortinnartutut misigisaramikkik.

Enok Poulsenip kingullertigut nivissat inuusuttut paamiormiut sisamat erinarsortoralugit, neriusaamik taallugit marlunnik saqqummiivoq.

2004-mi CD-mik saqqummersitsinermi inuusuttut pingasut hiphoppertartut, imminnut taasimasut Prussic nersorniarneqarput. Prussicikkikkut ukiup ataatsip matuma siorna CD-mik saqqummersitseqqaarput, imigassamik aalakoornartutorneq ikiaroornartumillu hashitorneq pissusissaanngitsoq taalliarisaramikkik, taamaaqataanillu angajoqqaat maligassiuisannginnerannik atugarliorneq ersersinneqarluni.

Kodap ukioq-manna nipilersullammammik nersorinninnermini nipilersoqatigiinni KISHIMAmi nipilersortartoq Henrik Høyer Jensen akissarsisippaa. KISHIMA CD-liaqqaartik siorna saqqummersippaat,

Nersorniarneqartut tamarmik 20.000 koruuninatsinneqarput.

Kodap Katuami ippassaq akissarsisitsinerata kingorna TV-kut radiokkullu aallakaatitsereermat, appisimaarimmik taallugu nipilersortoqarpoq, inuusuit utoqqasaanerusullu tusarnaartitsisarlutik.

Rusland siulittaasunngussaaq

Issittumi siunnersuisoqatigiit Islandimi ullumi ataatsimiilerput.

Issittumi siunnersuisoqatigiit Island taarserlugu Ruslandip aallartitaanit nunanut allanut ministerimit Sergey Lavrovimit ukiut marluk tulliuttut siulittaasuuffigineqalissapput.

Issittumi siunnersuisoqatigiit Islandimi Reykjavikimi ullumi ataatsimiilerneranni issittumi silaannaap allanngornerata nalunaarusiarineqarnera eqqartussavaat. Islandip siulittaasuutitaqarnini naggaserlugu tamanna pingaanerutillugu eqqartortikkusussimavaa.

Etoiles Polaires

Kulturikkut festivaaleqarneq taaguuserneqartoq Etoiles Polaires, kalaallisuunngorlugu Qaasuitsup ulloriai, Nuummi kulturip illorsuani Katuami ualeru sisamat qeqqanut ammaanersiorneqassaaq.

Festivaali ammarlugu nipi atorlugu saqqummersitsissaaq suleqatigiissitaq ”Sonic Pictures”-imik taaguuserneqarsimasoq, tamatuma kingorna aqagu unnukkut festivaalimi pisussat annersaat, tassa qitittariaatsimik Hip Hop-mik takutitsineq Katuami aamma takutitsissutigineqassaaq.

Tassani Nuuk Posse, Prussic rappertartullu allat belgiamiunik marlunnik qititsitsinermi aqutsisoqartumi tusarnaarneqarsinnaassaput, tusarnaartitsineq imigassartaqanngitsumik ingerlanneqassalluni.

Etoiles Polaires aqagu ammarneqareerpat sapaatip tungaanut ingerlanneqassaaq. Ilaatigut torlorsortartut inngertartut nipilersornermik nutaaliamik akoorlugit tusarnaartitsissutigineqassallutik. Tamatuma saniatigut Hip Hop pillugu workshop ingerlanneqassaaq. Belgiamit Islandimit nunanillu issittumiittunit filamiliat aamma takutinneqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat