Sociologi: Taasisitsineq misigissutsinut tunngassuteqaqaaq

Namminersorneq pillugu taasisitsineq misigissutsinut tunngassuteqaqaaq, aamma ajunngilaq, misigissutsimmi inuunermi pingaaruteqaqaat, taama oqarpoq sociologi Maliina Abelsen.
novembarip 14-at 2008 13:19

- Inuiaqatigiittut misigissuseq peqqinnartuuvoq, tassami namminiilivinnissaq anguniarneqarpat inuiaqatigiittut misiginissaq ataatsimuulersitsissaaq, sapigaqanngissusermik, nukissaqassusermik nuannaarnermillu pilersitsisussaq, Maliina Abelsen oqarpoq.

Piviusut aallaavigalugit inuiaqatigiissutsimik pingaartitsineq inuiaat aaqqissuussaanerannut pingaaruteqarnerarpaa, oqarluni maannakkorpiaq misigissutsit namminersornerlu pillugu isumaqatigiissutip taputartuunneqarnerat pinngitsoorneqarsinnaagunanngitsoq.

Taasisitsineq kalaallit kinaassusaannut pingaaruteqassava?

- Isumaqarpunga pingaaruteqartorujussuusoq, allaat ingasattajaarunneqartutut oqaatigineqarsinnaalluni, uffa namminiilivinneq pineqanngitsoq, taasissutissarlu tassaammat namminersorneq, Namminersornerulluni Oqartussaanerup nanginneratut taasarialik, qaquguugaluarnersoq namminiilivinissap tungaanut aqqusaagassaq, Maliina Abelsen erseqqissaavoq.

Namminersorneq pillugu taasinermi kalaallit maanna eqqarsaataanniippoq Namminiilivikkiartorneq angissanerlugu naaggaassanerluguluunniit.

- Isumaqarpunga Namminersorneq pillugu isumaqatigiissut kalaallit qanoq isummerfigissaneraat qitiulluinnassasoq, taasiartornermi misigissutsit apeqqutaalluinnassammata, Maliina Abelsen naggasiivoq.