Socialministeri ikiuukkusuppoq

Danmarkimi inunnik isumaginninnermut ministerip Eva Kjer Hansen-ip nunatsinni meeqqanik sumiginnaanermik ajornartorsiuteqarneq tusarsimavaa, pisariaqartinneqassappallu ikiuunnissamut piareersimasimalluni Danmarkimi aviisinut nalunaarpoq.

- Danmarkimi meeqqanik sumiginnaasarnermut atatillugu ajornartorsiutinik aaqqiiniarluta sulinitsinni misilittagarpassuaqaratta, piareersimavugut Kalaallit Nunaanni pisortat suliniarneranni ikiuunnissamut oqaloqatiginninnissamullu, Eva Kjær Hansen Danmarkimi aviisimut Kristeligt Dagblademut oqarpoq.

Aningaatigut ikiuunnissaq matumani eqqarsaataanngitsoq, Danmarkimili meeqqanik sumiginnakkanik sullissinerminni namminneq misilittakkaminnik nunatsinni iluaqutigineqarsinnaasunik tunniusserusullutik Eva Kjer Hansen oqarpoq.

- Maani Danmarkimi meeqqanik sumiginnaasarnermi ajornartorsiutinik aaqqiiniarluta ukiorpassuarni misileraasarsimanitsinni pissarsiagut pitsaasumik inerneqartut Kalaallit Nunaannut aamma tunniukkusuppagut, Eva Kjer Hansen oqarpoq. Isumaqarnerarpoq Danmarkimi soorlu angajoqqaanik ilinniartitsisarneq, angajoqqaanut annersaasartunut toqqissiviilliortitsisartunullu ilinniartitsisarnerit, meeqqanut ilaqutariinni imigassamik atornerluiffiusuneersunut ikorfartuineq kiisalu meeqqanik angerlarsimaffiup avataanut inissiisarnermi misilittakkatik pillugit nunatsinni pisortat oqaloqatigilluarsinnaassagini. Ikiuukkusunnerminnut atatillugu atortussanik sullissisussamillu ataatsimik atorfinitsitsinissartik aamma periarfissaalluartut Eva Kjer Hansen oqarpoq, erseqqissarlugulu ikiuinissamik neqeroorutertik qulaaninngaannit naalakkersuiniartut paasineqassanngitsoq.

- Ikiuukkusunnerput Kalallit naalakkersuisuisa namminneerlutik aalajangersinnaatitaanerannut akuliunniarnertut paasineqassanngilaq, uagummi sulinitsinni soorlu Norgemi Sverigemilu periutsit aamma pissarsiaqarfigisimavagut, Eva Kjer Hansen Kristeligt Dagblademi issuarneqarpoq.

Eva Kjer Hansen-ip Ilaqutariinnermut ministeri Tommy Marø sapaatip akunnerata tulliani nunat avannarliit ministeriisa Savalimmiuni ataatsimeeqatigiinnissaanni naapissavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat