- Pisariaqartinneqarpoq inuit pineqartut atugarliortinneqarsimasullu utoqqatserfigineqarnissaat. Tamanna ullumikkut qularutigineqarsinnaanngilaq. Taamaattumik naalakkersuisuutitaqalissagutta tamaaliorusuppugut, Mogens Jenseni Danmarkip Radioanut oqarpoq.
Danmarkimi arnat 1960-ikkunni pinngitsaalillugit naartusinnaajunnaartinneqartarnerat pillugu misissuisitsinissaq Folketingimi ungasinngitsukkut aalajangiunneqarpoq. Tamatumalu kingorna Siumup suliuttaasua, Aleqa Hammond, piumasaqarpoq meeqqat pinngitsaalillugit aallarunneqarsimasut assiganik pineqassasut.
Dansk Folkepartiimit isumaginninnermi oqaaseqartartoq, Martin Henriksen, Kalaallit Nunaannut utoqqatsernissamik neriorsuuteqarsinnaanngilaq.
- Oqaluttuarisaanermi assigiinngitsorpassuarnik pisoqarsimavoq, ullumikkut isiginnittaaserput malillugu eqqarsaatigisinnaanngisatsinnik, taama Martin Henriksen DR-imut oqarpoq.