Socialdemokraatit utoqqatserusuttut
Utoqqatserneq kunngeqarfimmi meeqqanut naalagaaffiup sullissiviini 1950-ikkunni 1960-ikkunilu ajortumik pineqarsimasunut tamanut aamma atuutsinneqassaaq, matumani ilaatigut meeqqat angerlarsimaffiini najugaqarsimasut, ineriartornermikkut akornutillit eqqarsartaatsimikkullu nappaatillit pineqarlutik.
Aviisi Politiken ullumi saqqummersoq taama allaaserisaqarpoq.
Socialdemokraatit siulittaasuata Mette Frederiksenip partiini Folketingimi aalajangiiffigisassatut siunnersuummik saqqummiussiniartoq aviisimut oqaatigaa.
Taamatut siunnersuuteqarnermi innarlerneqarsimasut pillugit ilisimalinnit nassuiaasiortoqassaaq, tamatumalu kingorna naalagaaffiup pisortatigoortumik utoqqatserfigissavai.
AAMMA ATUARUK Knud Foldschack: Naalagaaffik aamma utoqqatsertariaqarpoq
Socialdemokraatit taamaalillutik isumaminnik allanngortitsipput, taakkumi naalakkersuisuutitaqarnerminni utoqqatserumannginnamik. Tamannalu partiip siulittaasuata Mette Frederiksenip Politikenimut aamma nassuerutigaa.
- Innarlerneqarsimasut eqimattakkuutaat arlallit oqaluttuarisaanermi puigorneqarsimanerat maanna erseqqilluinnarpoq, taakkulu oqartussaasunit sakkortuumik sumiginnarneqartarsimapput. Piffissami nutaajunerusumi tamakku pisarsimanerat ilungersunartuuvoq, aamma pineqartut inuttut pisinnaatitaaffiinik aaqqissuussamik unioqqutitsisoqartarsimavoq, taakkulu suli inuupput uatsinnillu tusaaniarneqarnissartik pisinnaatitaaffigaat, aviisimut taama oqarpoq.
Aamma atuaruk ASSIT Meeqqat "misileraataasimasut" sisamat maanna utoqatserfigineqarput
Siunnersuut Enhedslistenimit SF-imillu ilalerneqarpoq. Aamma De Radikalet Dansk Folkepartiilu siunnersuut misissuataarumavaat.
Danskilli naalakkersuisui isumaqataavallaanngillat.
- Isumaqarpunga oqaluttuarisaanerup oqaluuserineratigut ikit mamisinniarneqartariaqartut, naalagaaffiup misissuineri annertuut aqqutiginagit, danskit isumaginninnermut ministeriat Karen Ellemann Politikenimut taama oqarpoq.
Aamma atuaruk Kalaallit meerartaannik misileraanermut peqataasimanini Red Barnetip ajuusaarutigalugulu utoqqatsissutigaa
Aamma atuaruk Ilsimasallip ammasumik pisoqarnissaa amigaatigaa
Aamma atuaruk VIDEO Saammaateqatigiinnissamut isumalioqatigiissitaq misissuisoqarnissaanik ujartuisoq