Assi: Siumut

Socialdemokraatit: Aleqamut tatiginninneq annikillivoq

Attaviitsup Aleqa Hammondip, Folketingimi Kalaallit Nunaannut tunngasunut ataatsimiititaliami siulittaasunngornissamik Venstrep neqeroorutaanut akuersinermi kingorna Folketingimi partiit saamerliit suleqatigiinnerannit peersitaavoq.

Siulittaasunngortumut tatiginninneq annikillisoq, Socialdemokraatit Nunatsinnut tunngasunik oqaaseqartartuata oqaatigaa.

Aleqa Hammond ullormi siullermi siulittaasutut suleqqaarnermini Kalaallit Nunaannut ataatsimiititaliami avissaartuutsitsilereersoq, Socialdemokraatit nunatsinnut tunngasunut oqaaseqartartuata Karin Gaardstedip oqaatigaa.

- Sulinerata allartinnera soorunami takoqqaassavarput. Kisianni partiini talerperlerniilerami partiit illuaniilerpoq. Ministeriunermi talerperliillu iligai. Tamannalu uannut nutaajuvoq, taamaammat Aleqamut siusinnerusutulli tatiginnissinnaanngilanga. 

Aleqa Hammondip Nunatsinnut ataatsimiititaliami siulittaasunngorniarluni partii Venstre isumaqatigiissuteqarfigaa - tassalu Lars Løkke Rasmussenip naalakkersuisuuneranik uppititsisinnaasuni taaseqataasarniarnani.

Kalaallimik siulittaasoqarnissaq S-ip kissaatiginikuuaa

2015-imi qinersisoqarnerata kingorna Venstrep Kalaallit Nunaannut ataatsimiititaliami siulittaasuuffik kalaallit folketingimi ilaasortaatitaannut tunniunneqartarsimasoq namminneq tigummassuk 

Socialdemokraatit isornartorsiuipput.

Siulittaasuuffiup kalaallimik inuttaqarnissaa Socialdemokraatit suli taama isumaqarfigaat. Aleqa Hammondilli toqqarneqarnera ataatsimiititaliami ilaasortanit allanit taperserneqarani pisoq, Karin Gaardstedip erseqqissaatigaa.

- Aleqa Hammondip siulittaasunngornera tapersersuinikkut pinngilaq, uangalu isumaqarpunga, ataatsimiititaliami suleqatigiillualernissamut tamanna pisariaqaraluartoq, Karin Gaardsted oqarpoq.

Socialdemokraatit Kalaallit Nunaannut tunngatillugu suliaqarnermi Siumut qaninnerusumik suleqatigilerniaraa, partii nalunaaruteqarpoq.

Nunatsinnut tunngatillugu ataatsiiititaliami Aleqa Hammondip siulittaasup tullerisimavaa. Taannalu inissisimaffik ataatsimiititaliap ukiup tulliani ataatsimiinnerani inuttalerneqaqqittussanngorpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat