Sisoraatinik snowboard-inik freestyle-nillu Danmarkimi pissartanngorniunnermi Norge-mi ingerlanneqartumi kalaallit unammeqataasut marluk ajugaasunut ilaapput.
Pissartanngorniunneq Norge-mi Ringkollen Parken-imi ingerlanneqarpoq.
Unamminermi angusat qarasaasiakkut attaveqatigiittarfimmi Facebook-imi quppernermi Snowball Sisimiut-ni atuarneqarneqarsinnaapput.
Ullut arlaqanngitsut matuma siorna oqaluttuaraarput, 17-nik ukiulik Jonas Strømsted Nuuk, sisorariaatsimi boardercrossemi guld-innattoq. Angutit Snowboard-imik unammineranni Jonas Strømsted aamma pissartanngorpoq.
Aamma atuaruk Snowboarderluni DM-ertoqarnerani kalaallit takutitsilluartut
Arnat sisorariaatsimi Big Air snowborderluni unammineranni Nanna Lennert pissartanngorpoq tulleralugu Ane Møller, tamarmik Sisimiuneersut.
Arnat taakkua marluk Sisimiuni sisorartartut peqatigiiffiat Snowball Sisimiut sinnerlugu unammipput, sapaatillu akunnerata aallaartinnerani ajugaasunut ilaallutik..
Anthon Siegstad Snowball Sisimiuneersoq inersimasut unammineranni sølvinnappoq.