SMS Inuit oqaasii atorlugit
Alaskami inuppiat smartphonemikkut oqaatsitik atorlugit imminnut sms-itigut maannamut allaffigeqatigiissinnaasimanngillat.
Inuppiat naqinnerit atortagaat tuluttut atorneqartartunit allaanerupput. Tuluit atortagaat naqinnerit 28-iupput, Inuppiat naqinnerit atortagaat arfinilinnik taakkunannga amerlanerupput.
Alaskamiittumi Kotzebuemi najugallit qatanngutigiit Grant aamma Reid Magdanz isumaqarsimapput namminneq oqaatsitik atorlugit sms-inik nassitsisinnaasariaqarlutik, taamaattumik Iphoninut ivertinneqarsinnaasunik app-imik sanasimapput.
Qatanngutigiit aappaa Reid Magdanz atuagassiamut The Arctic Sounderimut oqarpoq pingaaruteqartoq nunap inoqqaavisa namminneq oqaasii qarasaasiani oqarasuaatinilu akuutinneqarnissaat.
Oqaatsit atorneqarpallaanngitsut assersuutigigaanni oqaatsinullu atorneqarluartunut teknikkikkut naligiisillugit, taava taakku aamma atorneqarlualissapput.
Taanna ilanngullugu oqarpoq kalaallinit isumassarsitinneqarsimalluni. Inuppianummi naleqqiullutik kalaallit oqaatsitik ulluinnarni niuveqatigiinnerminnilu atorneruaat.
Qatanngutigiit Inuppiatut naqitakkanik app-iliornerminnut akunnerit 30-it atorsimavaat. Allakkanillu taaguusersimallugit - inuppiaat naqinnerinut atsiullugit, appilu taanna pisiniarfimmit aaneqarsinnaasoq.
