SMS Festival Saqqami aallartilerpoq

Nipilersornerit, isiginnaartitsinerit eqqumiitsuliornerit allarpassuillu pissapput, Saqqaq Midnight Sun Festival, SMS-imik naalisarneqartartoq, Ilulissat pigisaanni Saqqap nunaqarfiata kangiatungaani Kangerluarsummi, unnugu nal. arfineq’pingasunut aallartippat.

SMS Festivalimi ataqatigiissaarisoq Randi Broberg oqaluttuarpoq Festivali imigassartaqanngitsumik aanngajaarniutinillu atuiffiunngitsumik ingerlanneqassasoq, inuusuttut asimiinnerminni anersaakkut nukittorsarnissaat, inuttut ammarsarnissaat, inuusuttoqatitik peqatigalugit piginnaasaminnik pikialaartitsinissaat kiisalu angerlarunik ingerlatitseqqiinissaat anguniarneqartoq.

Inuusuttut peqataasut naammassisimasaminnik Ilulissani Kulturikkut Illorsuarmut takutitsiartornissaat pilersaarutaasoq.

SMS Festival ukioq manna piviusunngortinneqarpoq SMS Komité-p Inuit Youth Internationalimik suleqateqarneratigut.

Festival sapaatip akunnera ataaseq ingerlassaaq, tassa julip ulluisa 20-iat tikillugu.