Smartphonet stressilersitsisarput
- Taamaaliunngikkutta suna tamarmi kinguaattuussaaq, ilinniarnertuunngorniaq 17-inik ukiulik oqarpoq.
Facebook oqarasuaatikkut alapernaaserneqartuartariaqarpoq. Inuusuttullu akulikitsuaqqamik taamaaliortarput, pinngitsoorsinnaanngilaammi!
- Eqqarsaatiginaguluunniit taamaaliortarpugut, taamaattussaannartut isigaarput. Smartphoneserput kaasarfitsinniit amugutsigu suut tamaasa malinnaavigilertarpavut, ilinniarnertuunngorniaq arnaq 17-inik ukiulik oqarpoq.
Ilisimatusarneq pillugu tusagassiortoq, Søren Hebsgård, ilinniarnertuunngornianik 538-nik apersuisimavoq, smartphonesitik qanoq atortarneraat paasiniarlugu.
- Oqarasuaatiminnik angallattakkanik taama atuitiginissaat taakkununnga pisariaqartorujussuuvoq. Taamaammat uisakajaarnerulersarput, inuusuttorpassuillu taamaalillutik suut tamaasa puigortarpaat, aalajangersimasumillu aallussiniaraluaraangamik taamaaliorsinnaajunnaartarput, ilungersorlutillu misiliigaluaraangamik itigavittarlutik, Søren Hebsgård oqarpoq.
Smartphonesillu atuisartut ulluinnarni eqqissisimalaanngitsoortarput, tassa qaratsamik qasuersaartilaarnissaat puigortarpaat. Minutsit qulinnguit- 15-innguit allanik eqqarsaateqaratik qasuersaartartussaagaluarput. Tamanna peqqinnanngilaq, ilisimatusarneq pillugu tusagassiortoq, misissuisitsinissamik isumassarsisuusoq, isumaqarpoq.
Oqarasuaammik atuisartup, arnap inuusuttunguup, tamanna aamma nassuerutigaa. Nalunngilaa smartphonesini atorpallaarlugu, qasuersaarnissanilu puigortarini... taamaaliunngitsoorsinnaanngilarli.
- Allamik susassaqanngikkuma, mobilera alakkariartupallattarpara, taanna oqarpoq.
Danmarkip Radioanit Jakob Andreassenip ilanngutassiaq suliaraa, qallunaallu inuusuttut oqarasuaatinik angallattakkanik qanoq atuisartiginersut misissuivigineqaraluartoq, Nunatsinni aamma ilisarsisorpassuaqassagunarpoq.
