Slovakiamioq Ilulissani persuttaasoq

Ilulissani politiit sapaatip akunnerata naanerani ulapaarsimapput. Quppernerit 14-it atorlugit nalunaarsuisoqarsimavoq, taamaattoq immikkut taasarialittut ataaseq taamaallaat tikkuarneqarpoq.

Slovakiamioq 50-nik ukiulik ullut 15-it isertitsivimmittussanngorpoq sapaatip akunnerata naanerani kamarujussuarluni politeeq saassukkamiuk. Qujanartumillu slovakiamioq politiip suleqataata ikiuunneratigut tigusarineqarpoq ippassarlu eqqartuussivimmut sassartinneqareerluni ulluni 15-ini tigumigallagassanngortinneqarpoq.

- Aallarniutaavoq annertunngikkaluamik imerniartarfimmi eqqissivoolliorneq. 50-nik ukiulik angerlarsimaffianukaapparput, suleqatittalu biiliniit niutikkaani peqqutissaqanngivilluni qaavatigut tilluppaat tamatumalu kingorna tinngivigalugu toqqusassillugu. Politiip allap slovakiamioq unitsippaa ilaatigut peberspray atorlugu, tamatumalu kingorna passequserneqarpoq isertitsivimmullu inissinneqarluni, Ilulissani politeeqarfimmi ulluinnarni aqutsisoq Karl Vinther oqarpoq.

Slovakiamiup nammineq oqaatsini kisiisa atormagit akunnerpaaluit atorlugit eqqartuussivimmi killisiorneqarpoq.

- Ilaatigut ajornakusoorsimavoq, pineqartup nammineq oqaatsini kisiisa atormagit. Qujanartumik illoqarfimmi inummik nassaarpugut slovakiamiusut tuluttullu oqalussinnaasumik. Taamaasilluta qulakkeerparput slovakiamiup eqqartuussivimmi suliarinera pissuserissaartumik pisoq. Taamatulli ajornakusoortumik sassartitsineq sulisunut aningaasartuuteqangaatsiarnermik kinguneqarpoq, Karl Vinther oqarpoq, ilanngullugulu oqaatigaa suleqatertik tillutsittoq ajunngitsoq.

Taamaattoq politeeq tillutsittoq napparsimmaviliaanneqartariaqarsimavoq tassanilu mersortilluni sisamanik kilulimmik. Pebersprayilu atorneqarsimanngitsuuppat slovakiamioq aamma ajoqusersimasinnaagaluarpoq.

- Politiit saassunneqarnerat ilungersunartorujussuartutn isigaarput qujamasuutigaarpullu eqqissisimasumik tigusarinqarmat. Peberspray sakkuuvoq ajunngivissoq. Taanna atorsimanngitsuugutsigu anaatat atortariaqarsimassagaluarpagut suleqatitsinnik toqqusassiinera unitsinniarlugu. Kisianni tassani anaatat atornagit suliaq naammassivoq qujamasuutigaarpullu peberspray-it atoratsigit, Karl Vinther oqarpoq, ilanngullugulu oqaatigaa tigusarineqartup sivisujaamik isertitsivimmiinnissani ilimagisinnaagaa paasiniaaneq naammassippat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat