Slobodan Milosevic ilisaavoq
Slobodan Milosevic illoqarfimmi inunngorfigisamini Pozerevac-imi ullumi ilisaavoq. Milosevic Inuit pisinnaatitaaffii pillugit eqqartuussiviup Haagimiittup paarnaarussivianiitilluni tassanngaannarluni sapaatip-akunnera kingulleq toquvoq. Timaa Serbiamut pingasunngormalli tikiunneqarpoq, ullumilu ulloq ilaqutariit Milosevicikkut illorsuata naatsiiviani ilineqarpoq.
Milosevicip timaa illerfimmi ammasumiittoq Serbiami illoqarfiit pingaarnersaanni Beogradimi inatsisartut illorsuata saavaniitinneqartoq inuppassuit siuleriiaarlutik ulluni kingullerni saneqquajuarpaat.
Timaata Serbiami ilineqarnissaanik aaqqissuisuusut ilimagisimagaluarpaat inuit 100.000-ilikkaat arlallit ullut tamarluinnaasa saneqquasassasut. Naallu Milosevic-imik naggammik inuulluaqqusiartorlutik Serbiami nunaminnik ingasattajaarlutik pingaartitsiniartut, nationalistit, amerlasoorsuanngorlutik nunamit tamarmit aggiasimagaluartut, tusarfiit oqaatigaat 80.000-it ullumi aggiasimasut.
Milosevic naalagarsuutillugu isigisaq tamaat ujameriattuinnanngorlugu nilleratigineqartarpoq, naatsorsuutigisamillu ilerfiat ikinnerugaluartut, amerlanerisa takutippaat Milosevic-ip ukiuni 13-ini Serbiami præsidentiunermini ingerlatseriaasianik suli illersuisoqartoq.
Præsidentiunermi kingorna sorsunnermi pinerluuteqarsimasunik eqqartuussivimmit inuiannik nungusaasimasutut unnerluutigineqarpoq. Parnaarussaaqqanermilu nalaani tassanngaannaq qanittukkut toquvoq.
Nunat tamalaat Milosevicip pinerluuteqarsimasutut unnerluunneqarnera eqqaallugu ilisaanissaata persuarsiutiginerunissaa assuarigaluaraat, aaqqissuisut nunamini ilisaanissaa tassa naammassivaat.
Slobodan Milosevicip ilerrata ujarattaa ullumi ilisaanerani napparneqarmat takuneqarsinnaavoq aqqata saniatigut nuliata aqqa aamma allassimasoq, tappavani ileqqut malillugit taamaattussaammat. Kisianni nulia Mira Markovic ernerallu imaluunniit naalagaaffiup sinniisai ataqqininniarlutik ilisaanerani najuutinngillat. Mira uimi præsidentiunerata nalaani pissaanermik atornerluineragaalluni, nunaminut uteraluaruni pissani pissagaa siorasaarneqarsimanini pillugu, suli erninilu Ruslandimi qimarngupput.
