Slettemarkip timersuutini ukalerniarnermut assersuuppaa
- Sisorarluni ooqattaasarneq kalaallit ukalerniartarnerannut assinguvoq. Apummi ingerlajuartarpugut, aalalluaraangattalu aallaammik igilerutta pissanganerput tassa pigiinnartarparput, umigarpulli eqqussagutsigu timerput aamma eqqissisimatittussaavarput. Taamaammat sisorarluni ooqattaasarneq Kalaallit Nunaannut naleqquppoq. Kalaalerpassuit namminneq pigisaminnik aamma aallaaseqarput, soqutigilluakkaminnik paarilluakkaminnillu, Øystein Slettemark nutaarsiassaqartitsivimmit Ritzauimit issuarneqarpoq.
Øystein Slettemark 2001-imili sisorarluni ooqattaasartalerpoq, kattuffimmillu taamanikkut pilersitsilluni, Nunatsinnilu piniartarnini aamma sungiusaatigilluartarpaa. Aallaanni nassarlugu aasakkut qaqqaniittaqaaq, tamanna aamma sungiusaatigilluartarlugu, taamaalillunilu aamma nerisassarsiorluartarpoq.
- Ujakkaartartuusugut sisorarlutalu ooqattaasartartuusugut arriitsumik nalunaaquttap akunnerpassuini sungiusartarpugut. Tassa upernaakkut aasalerneranilu piniarnissaq kajuminnarnerusarpoq. Nalunaaquttap akunnerini tallimani-arfinilinni qaqqaneereersimallunga tuttumik nammallunga angerlaraangama, sungiusarluartaqaanga, Øystein Slettemark oqarpoq.
Canadami Vancouverimi OL-imut Nunatsinniit peqataanissaminut maanna piareeqqavoq, angutillu sukkasuumik arfininngorpat arpanneranni peqataaqqaassaaq.
