Slettemarkip OL-imut piumasaqaatit issarianernik tallimanik qaangerpai
Øystein ujakkaarnermini ingerlalluarpoq, pallorlunilu ooqattaasarnermini eqqoriakkani tamaasa eqqorlugit. Kaajallakkiartugassani pingasuusuni marluk pitsaalluinnartumik aqqutigereerlugit, aatsaat taamak angusarissaartigisussatut inissikkaluarpoq. Taamaattorli nikuilluni ooqattaasarnermini sisamariarluni uniornermigut angusarissaarpallaanngitsoorpoq. Taamaattorli Danmarkip OL-imut peqataanissamut piumasaqaataanit sekundinik tallimannguanik sukkanerusumik apuulluni.
- Ruhpoldingimi ujakkaarnissaq sioqqullugu ingerlalluaqqilersinnaanissara anguniarlugu arlalinnik iliuuseqarpunga, tamannalu iluatsittutut oqaatigineqarsinnaavoq. Ataatsimut katillugit angusarissaarnerpaamit 2,33 minutsiinnarnik kingulliuvunga, tamannalu naammagisimaarpara, ujakkaajutigaluni ooqattaasartartoq unamminerup kingorna oqarpoq.
Øystein Slettemark OL-imut peqataanissamut piumasaqaatinik maanna naammassinnereersimalerpoq, Danmarkilu unammissummut tassunga peqataatitaqassappat, peqataasinnaassalluni. Tamanna ullut arlaqanngitsut qaangiuppata paasinarsissasoq, Nunatsinni Ujakkaajutigaluni ooqataasartartut Kattuffiata nalunaarutigaa.