Slettemark EM-mi ilungersunartorsiorpoq
Sisoraatinik ooqattaasarluni inuusuttuni nunarsuarmi pissartaq Ukaleq Slettemark, europami inuusuttut ooqattaasarlutik Norgemi pissartanngorniuneranni naggataarluni sapaammi unammeqataavoq.
Ukaleq Slettemark normu 19-inngorpoq, taassuma siuliini ooqattaasarnerni marlunni normu 12-inngoriarluni.
AAMMA ATUARUK Ukaleq Slettemark EM-imi angusarissaartorujussuuvoq
Ukaleq Slettemarkip pissartanngorniunnermi ikiortaa ataataalu, Øystein Slettemark arfininngornermi KNR-imut oqaluttuaraa, Ukaleq Slettemark ooqattaasarluni igeriarnissani iluatsilluaruniuk pitsaanerit qulit akornaniissinnaasoq, taamaattoqanngilarli.
Ooqattaasarluni igeriarnissamut ullumi sila pitsaavallaanngilaq, sakkortuumimmi anorlerami, Østein Slettemark oqaluttuarpoq.
Igeriarnermi siullermi Ukaleq Slettemark eqquigassaq pingasoriarlugu uniorpaa, taamaalillunilu normu 12-unermiit 35-nut kinguariarpoq.
Angusai pitsanngoriartortut
Tassanngaaniilli angusai pitsaanerulerput. Igeriarluni eqqoriagassat tullii ataasiarlugit uniorpai.
Taamaalillunilu qaffakkiartorusaarpoq naggataatigullu normu 19-nngorluni. Taamaakkaluartoq pissartanngorniunnermi angusarineqartut Østein Slettemarkip tulluusimaarutigisorujussuai.
Slettemark 17-iinnarnik ukioqarpoq unammeqatigisaalu 22-nik ukioqarlutik taamaattumik angusarineqartut kusanartorujussuupput, Østein Slettemark oqarpoq.
Ukaleq Slettemarkip unamminissai tulliit tassaapput Norgemi pissartanngorniunnerit taakkua sapaatip akunnerani tullermi aallartissapput.