Slagelse-mi toqutsineq eqqartuussisutigut suliarineqalerpoq
Arnaanni sakiaatigut savimmik kapillugu toqutsisimasutut pasineqarnermi saniatigut, 29-nik ukiulik aamma unnerluunneqarpoq arnaamminik suli naartusumik unataallunilu isummissaasimasutut, mattaanngarmi qimaasariaqartilerlugu.
Arnap toqutaasup qimatarai naalungiarsuk qaammammik ataatsimik utoqqaassusilik, qitornanilu alla anginerumaaq allamik ataatalik. Sjællandimi tusagassiuutit naapertorlugit naalungiarsuk Danmarkimi ilaqutariinni qitornarsiaavoq, anginerlu Kalaallit Nunaanni ilaquttaminiilluni.
Siorna septemberip 21-ianni arnaq uummammigut savimmik kapineqarnermi kingorna toquvoq. Aappariit inigisaanniit ikioqqulluni siarnertoqarpoq. Arnap saniatigut maanna unnerluutigineqartoq inissiamiissimavoq. Taamaattumik politiit isumaqarput angerlarsimaffimmi eqqissiviilliornerup nalaani toqutsineq pisimasoq.
Arnaq napparsimmavimmukaanneqaraluarpoq kingornali ikini toqqutigalugu.
29-nik ukiulik toqutsisutut pisuunnginnerarpoq. Eqqartuussineq eqqartuusseqataasut peqataaffigisaat natsorsuutigineqarpoq pingasunngorpat tallimanngorpalluunniit aalajangiiffigineqassasoq. Suliaq matoqqasumik ingerlanneqassaaq.
