Skyfactorimi kalaallit erinarsullaqqissut periarfissinniarpaat
- Piukkunnartut unamminissaannut soqutinnittorpassuaqarpoq. Tallimanngornermi siullermik unammisitsilerutta peqataasut 22-ussapput. Taakku sapaatit akunneri marluk kingulleriit pattattartorput Ion Faghiura aqqusaarfigisarsimavaat taannalu siunnersortigalugu erinarsugassanik sungiusarsimavaat aammalu erinnap pitsaanerpaamik atornissaanut siunnersorneqarlutik. Assut pissanganarpoq scene-mi takutitsinerisa takunissaa, Victor Næss Nielsen unammisitsinermi aqutsisoq oqarpoq.
Peqataasut utoqqaassusaat allanngorarpoq assigiinngitsorpassuarnillu tunulequtaqarlutik. Taakku ilaat tassaapput taxa-rtartut, pisiniartitsisut atuartullu. Taakkunani pikkorinnerit pingasut juunip qulingiluaat finale-mi unammissapput aammalu ukiamut tusarnaartitsinermi peqataanissamik neqeroorfigineqassallutik. Ajugaasoq aamma Ipad-imik pinnatassaqarpoq aammalu inuit marluk neriniartarfimmi 2.500 koruunip nalinganut nerinissaannik pissarsissalluni.
- Uani sapaatip akunnerata naanerani peqataasut qulit missaat unnuit tamaasa peqataasassapput naatsorsuutigaarpullu juunip arfineq pingajuanni semifinalemi peqataasut arfineq pingasut qulillu missaanniikkumaartut. Finalemi pikkorinnerit pingasut peqataassapput taakkulu marlunnik atuissapput. Kina ajugaassanersoq aammalu siullermik unammereernermi ingerlaqqissanersut isiginnaariat kisimik aalajangissavaat, taamaattoq pisariaqassappat piukkunnartut nammineq toqqarsinnaavagut, Victor Næss Nielsen oqarpoq neriuutiginerarlugulu Skyfactor Hotel Hans Egedemi uteqqiattunngorluni pisalerumaartoq.
