Skydsbjerg: Pinngortitaleriffik eqqunngitsuliorpoq

Qilalukkat CITES-ip uumasunut nungutaanngujoortunut allattorsimaffiutaanut pingaarnermut nuutsinneqarnissaat ernummatigalugu qilalugarniarneq naalakkersuisunit unitsinneqarpoq.

-Taama aalajangerneq eqqortuuvoq pingaaruteqarlunilu, taamaattorli Kalaallit Nunaat taama ajornartorsiulersimassanngikkaluarpoq qilalukkanik ilisimasaqartut tamarmik nalunngimmassuk nunatsinni qilalugarniartarneq tugaavinnarnik tunngaveqarnani qilalukkalli neqaannik mattaannik tuugaavinillu pissarsiornermik tunngaveqartoq. Henrik Skydsbjerg, Nuummi kalaallit kusanartuliaannik tuniniaasarfimmik Tupilak-mik piginnittoq, Naalakkersuisunut ammasumik taama allagaqarpoq.

Henrik Skydsbjerg allappoq Pinngortitaleriffimmiut qilalukkat tugaavinik avammut tunisassiornerup qilalukkanik piujuaannartitsinissamut ajoqutaaneranik naliliiuminaatsitsinerat eqqunngitsuliornerusoq, qilalukkat nungutaanngujoornerannik naliliissagaanni pisassaanerup annertussusia apeqqutaasarmat.

Henrik Skydsbjerg Naalakkersuisunut allappoq qilalukkat tuugaavinik tunisassiorneq qilalukkanik nungusaataanngitsoq, tamannalu Pinngortitaleriffimmiut CITES-imut ilisimatitsissutigisimasussaagaluaraat. Aammattaarli qilalugarniartarnerup nunatsinnut qanoq pingaaruteqartiginera ilisimalluarsimanngikkunikku oqaaseqartariaqarsimanngikkaluartulluunniit Skydsbjerg allappoq.

Henrik Skydsbjergip allagaanut akilluni Pinngortitaleriffiup pisortaa Klaus Nygaard allappoq ilumoortoq nunatsinni qilalugarniarneq tugaanik pissarsiniarnerinnarmik tunngaveqanngitsoq.

Taamaattorli qilalugarniarnermi tuugaaq mattaap neqillu saniatigut pissarsiassaammat, pisassallu qanorluunniit annertutigingaluarpata qilalugarniarnermut tunngavioqataasoq Klaus Nygaard akivoq.

Nygaardip erseqqissaatigaa qilalugarniarnerup piujuaannartitsinissamik tunngaveqarnera ersarivissumik uppernarsineqarsimatinnagu, tuugaanik tunisassiornerup qilalukkat amerlassusaannut aaljangiisooqataanera aamma uppernarsineqarsinnaanngitsoq.