Skotlandimi inuiaqatigiiussutsimik pingaartitsisut tassa nationalistinik taaneqartartut Skotsit inatsisartuni ippassaq qinersereerneranni ajugaasimaaqisut, aviisip politikenip allaaserai.
Skotlandimi inuiaqatigiiussutsimik pingaartitsisut partiiat SNP inatsisartuni amerlanerussuteqaleramik maanna partiitut annerpaanngorput.
Inuiaqatigiiussutsimik pingaartitsisut 47-t Skotlandip inatsisartuini inissaqalerput, illuatungaatigullu Tony Blairip partiia tassa Labour-parti taamaallaat 46-nik inissaqartitsilluni, taakkulu partiit marluk naalakkersuisunngortitsinissamik pilersitsisussanngorput.
Labour-parti ukiuni 50-ni pissaaneqartortaasimagaluarpoq, ippassarlu qinersinerup inernerata kingorna taakku pissaaneerutsinneqarput.
Qinersinerullu inernerata aammattaaq ersersippaa Tony Blair Tuluit Nunaanni maannakkut iluarineqarpallaarunnaarsimanera, tamatumunngalu Irak-imi sorsunneq pingaarnertut patsisaatinneqarpoq.
Ullunilu aggersuni tulliuttuni Skotlandimi kikkut naalakkersuisunngortitsinissaat aalajangerniarneqartussassaaq.