Aaqarnermi atortut Skotlandimi atuartunuinnaanngitsoq ilinniartunuinnaanngitsorlu aammali pisariaqartitsisunut allanut aamma akeerupput.Assi: Marco Verch/flickr

Skotlandi aaqarnermi atortunik nunarsuarmi nunani siullersaalluni akeerutsitsisoq

Aaqarnermi atortut Skotlandimi pisariaqartitsisunut tamanut ullumi ataasinngornermi akeerupput. Skotlandimi tamanna pillugu inatsissatut siunnersuut 2020-mi akuerineqarami aaqarnermi atortut akeerunnissaannik aatsaavissuaq inatsisiliortoqarpoq.

Aaqarnermi atortut Skotlandimi pisariaqartitsisunut tamanut ullumi ataasinngornermi akeerupput.

Nutaarsiassaqartitsivik AFP taama allappoq.

Tamanna pillugu inatsisissatut siunnersuut Skotlandip inatsisartuisa akerliusoqaratik 2020-mi akuerigamikku, Skotland aaqarnermi atortut akeerunnissaat pillugu nunarsuarmi nunani siullersaalluni inatsisiliortuuvoq.

Tassa aaqarnermi atortut pisariaqartitsisunut tamanut akeerullutik soorlu atuarfinni pissarsiarineqariaannanngorput.

Tamannalu pisortat illuutaanni inunnit tamanit orninneqarsinnaasuni aamma atuuppoq.

Tassa aaqarnermi atortut Skotlandimi atuartunuinnaanngitsoq ilinniartunuinnaanngitsorlu aammali pisariaqartitsisunut allanut aamma akeerupput.

AAMMA ATUARUK Aaqarnermi atortut Skotlandimi akeerutissasut

Taamaaliornissaq piffissanngorsimasoq, Skotlandip ministeriunera Nicola Sturgeon oqarpoq.

- Skotlandi nunarsuarmi nunani siullersaalluni aaqarnermi atortunik pisariaqartitsisunut tamanut akeerutsitsinikkut maligassiulluni tamanna pillugu inatsisiliortooqqaarneranut akuerseqataanera tulluusimaarutigaara, taanna Twitterimini taama allassimasoq AFP allappoq.

Skotlandip taamaaliornera nunanut allanut Danmarkimullumi sunniuteqarpoq.

Aaqarnermimi atortut Danmarkimi aaqartartunut tamanut 2022-p naannginnerani akeerutsinneqarnissaat Danmarkimi partiit ilaata Frie Grønnep 2021-mi inatsisissatut aamma siunnersuutigigaa, aviisi Berlingske allappoq.

Siunnersuutaalli Folketingimi nuannaarutigineqarpianngilaq.

Naligiissitaanermi pillugu ajornartorsiutit allat aaqqiivigisassatut salliunneqartariaqartut, Socialdemokratit aamma De Radikale isumaqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl