Skotlandip namminiilivinnissamik taasisitsiniarnera Londonimi isumaqatigineqanngilaq
![](/sites/default/files/styles/image_934x467/public/article_images/sturgeon.jpg?itok=1afCk8Co)
Skotlandimi inatsisartunut qinersinermi inatsisartunut qinigaasut kisinneqarnerisa kingorna, Skotlandip Tuluit Nunaannit avissaarnissaanut nutaamik innuttaasunik taasisitsinissaq Skotlandimi ministeriunerup Nicola Sturgeonip sulissutiginiarpaa.
- Neriuppunga Skotland namminersulertissallugu, Nicola Sturgeon tuluit nutaarsiassaqartitsivinnut BBC-mut sapaammi taama oqarpoq.
Ministeriunerup Sturgeonip partiita, Skotlands Nationale Parti SNP, inatsisartuni qinersinermi ajugaavoq, qinersinermi kisitsisit arfinngornermi saqqummiunneqartut tamanna takutippaat.
Skotlandimi inatsisartut 192-nik ilaasortaqarput, taakkunanngalu SNP 64-nik ilaasortaatitaqalerpoq.
Johnson taasisitsinissamut itigartitsivoq
Skotlandimiunut ajornartorsiutaalerpoq, innuttaasunik taasisitsinissaq Tuluit Nunaanni naalakkersuisuinit akuerineqartussaammat.
Tuluit Nunaannilu ministeriunerup konservatiivineersup Boris Johnsonip taasisitsinissaq akuerinagu.
Taamaakkaluartoq Skotlandimiut tunniutiinnanngillat.
Sturgeon: Ataqqinninnginneq
- Innuttaasunik taasisitseqqiinissap itigartinneqarnissaanut tamat oqartussaaqataanerannik tunngavissaqanngilaq Sturgeon sapaammi unnukkut ajugaalluni oqalugiarami taama oqarpoq
Sturgeon BBC-mut oqarpoq, Skotlandimi innutaasut taasitinneqarnissaannut Tuluit Nunaanni naalakkersuisut itigartitsiinnavissinnaanngitsut.
Skotlandimiut tamat oqartussaanerat naapertorlugu kissaateqarnerannik ataqqinninnginnermik naalakkersuisut konservativiusut takutitsipput.
Boris Johhson akissuteqarluni oqarpoq, SNP-ip nutaamik innuttaasunik taasisitsinisamik anguniagaqarnera akisussaassuseqannginnerarpaa soqutigittaannerarlugulu.
Boris Johnson Sturgeonimut allagaqarpoq kaammattorlugulu, suleqatigiinnissamik, Tuluit Nunaat suleqatigiittumik taallugu.
Skotlandip Tuluit Nunaannit avissaarluni namminersulernissaa pillugu Skotlandimi innutaasut 2014-mi taasitinneqarput. Taamanikkut taasisitsisoqarnerani 55 procentii tuluit nunaannut ataannarusullutik taasipput.