Skiveliarnissaq qulakkeerneqarpoq

Skivemi Qasigiannguit ikinngutaasa peqatigiiffianni - Christianshåbforeningimi - ullumi eqqissiallattoqarpoq, ilaqutariimmi ikinnerpaamik arfineq-marluk atuartumik nunatsinneersumik qaammatini pingasuni anjugaqartitsinissaminnut piareersimallutik sapaatit-akunnerata naanerani nalunaarput.

- Skivemi nuannaartunnguaqarpoq, peqatigiiffimmi siulittaasoq Aase Jepsen, ukiut ingerlanerini meeqqat nunatsinneersunik 26-nik najugaqartitsisarsimasoq oqarpoq.

Peqatigiiffik tallimanngormat aviisimi allaaserisaqarluni ikioqquvoq, meeqqallu nunatsinneersut tallimat angajoqqaarsiassaqannginnerat Jyllandip qeqqani tusagassiuutinit sammineqarpoq. Angajoqqaarsiassanik tallimanik nassaartoqanngippat meeqqat 20-iusut Danmarkiliarnissaat taamaatiinnartariaqassasoq allaaserineqarluni.

Qasigiannguit Danmarkimi illoqarfittut ikinngutigisaa angajoqqaarsiassanik pisariaqartitsivoq

- Ukiut 50-issaannik taamaaliorsinnaanerput nuannaarutigeqaarput, Aase Jepsen oqarpoq, nunatsinniillu meeqqanik ukiut 50-it matuma siorna Skiveliartitseqqaartoqarsimanera innersuussutigalugu. Taamaniilli meeqqat 1093-it Skiveliartinneqarsimapput. Taakkulu ilarpassui kinguaariit pingajussaat Skivemiipput.

Peqatigiiffiup ikioqqunerata kingorna ilaqutariit saaffiginnittut ima amerlatigisimapput maanna angajoqqaarsiaasinnaasut sinneqalersimapput. Angajoqqaarsiassanik ukiormanna pissarsiniarneq sooq ajornarnerusimanersoq Aase Jepsenip oqaatigisinnaannginnerarpaa.

- Ukiumit ukiumut allanngorartarpoq, ukiormannali sapernarluinnarluni. Kisianni meeqqat ukiormanna aamma amerlanerupput 20-iullutik, siornami 12-14-it maaniipput, Aase Jepsen oqarpoq.

Meeqqat Qasigiannguaneersut aggustip aallartinnera Skivemut tikissapput.