Skive-mi katersugaasik Kalaallit Nunaannut tunngasunik saqqummersitsivoq
Assilissat titartagartaanik titartaasuuvoq Tjekkiaamioq eqqumiitsuliortoq Martin Velísek.
Knud Rasmussenip atukkiaa oqaluttuat oqalualaallu tjekkiamiut allattaasiannut nutserlugu 1998-imi atuaganngorlugu saqqummersinneqarpoq, atuakkallu tjekkiamiut allattaasiaat atorlugu saqqummersinneqarmat titartakkat taakkua maanna saqqummersinneqarlutik.
Atuagaq taanna Tjekkiamiut Danmarkimi aallartitaannit, ambassadør-iannit Zdenek Lycka-mit tjekkiamiutut nutserneqarpoq.
Zdenek Lycka saqqummersitsineq ammarlugu oqalugiarami, atuakkap nutserneqarnerani titartaasartumik Martin Velisek-imik suleqateqarsimanini oqaluttuaraa, Lycka oqarluni titartaasartup atuagaq nutserneqartoq nuannaarivallaarsimanngikkaa.
Tjekkiamiut Danmark-imi ambassadøria oqalugiarami oqarpoq, Knud Rasmussenip atukiaata tjekkiamiut allattaasiannut nutserlugu allanneqarnera titartaasartup atuaramiuk tamaaviallu atuartariaqaramiuk oqarsimasoq, aatsaat taamak atuakkamik ajortigisumik atuarsimalluni.
Titartakkat Skive-p katersugaasiviani saqqummersinneqarnissaat nalaatsornerinnaanngilaq.
Issittumi ilisimasassarsiortartup Lauge Koch-ip Kalaallit Nunaannit katersorsimasani, katersugaavimmut 1931-imi tunniuppai.
Katersugaasivimmi katersugaatit ilaat isugutammit ajoquserneqarlutik ikilisimagaluartut, Kalaallit Nunaannit katersugaatinit saqqummersitaqartuaannartut.
Tamannalu pissutigalugu Katersugaasivik Kalaallit Nunaannut tunngassuteqartunik soqutigisaqarluarpoq, Katersugaasiviup pisortaa Carina Serritzlew oqarpoq.
Martin Velisek-ip titartagai pissanganartuullutillu quujanartuupput, taamaattunillu titartaaniaraanni imaanaanngitsuussalluni, Carina Serritlew oqarpoq.
Titartakkat allanartunik quuianartunik unamminartunillu titartarneqarsimapput, ilai paquminarnissamut killisatik tikillugit titarneqarlutik.
Titartakkat saqqummersinneqarnerat oqalugeriartitsinernik arlaqartunik malitseqartinneqassaaq, ukiuuneranilu sulinngiffeqarnermi isiginnaartitsissut "Sassuma Arnaa" takutinneqassalluni.
